宋應星

宋應星

宋應星
性別：	男
異名：	長庚（字）
籍貫：	奉新
國籍：	明·南昌府
出世：	1587年 北鄉雅溪牌坊村
過身：	約1666年 戴家園祖墓
配偶：	視溪余氏、本邑王氏、靖安舒氏
爺：	宋國霖
娘：	魏氏
崽：	宋士慧、宋士意
學歷
萬曆四十三年舉人
經歷
分宜教諭 （1634年－1638年） 汀州府推官 （1638年－1640年） 亳州知州 （1643年－1644年）

宋應星（1587年—1666年_?），字長庚，南昌府奉新縣北鄉雅溪牌坊村（今下嗰宋埠鄉牌樓村）人。佢係明朝好有名嗰科學家。佢寫嗰《天工開物》箇本17世紀嗰百科全書容得許時間大量嗰科學技術門類，裡頭就有火藥武器箇滴子尖端武器、技術嗰介紹。佢到歷史上舞出嗰巨大成就，𠵹佢有時間會拕人跟法國嗰科學家狄德羅比得一起，話宋應星係「中國嗰狄德羅」。

祖望生平

家世

詳細嗰內容請參照 宋應星家族

揸得八修《宋氏宗譜》嗰《江西奉新世系考略》裡頭話嗰，宋應星屋裡最早嗰先祖係漢朝嗰九江太守宋均。隋唐嗰時間，後世宋釗開始搬家到新吳（奉新）住。但到嘍宋朝，宋應星嗰十世先祖宋瓚入贅熊氏人屋裡，故係改姓做「熊」，箇也係江西嗰大姓之一。末後佢嗰崽熊定五為到躲避戰亂，搦佢老婆嗰姓——「宋」做自簡嗰姓，但箇隻「宋」算不得係宋家人屋裡本身嗰祖姓。八修《宋氏宗譜》裡頭對箇場事係𠵹話嗰：「吾族自元以前本熊姓，二世祖定五公為劍江驛宰，娶於豐城宋氏，解組歸。值元明鼎革之際，初避兵亂，嗣畏國（明）威，遂承宋氏姓。元孔公舊譜著之甚詳。」之後，宋家人屋裡搬到奉新東首個雅溪（今下嗰潦水）岸舷，以經營田產過生。

宋應星老屋嗰村盤子上先頭都留得「三代尚書第」、「方伯第」、「世進士第」同得「世科坊」箇滴子大型牌坊（文革嗰時間拕毀吥嘍），箇也顯示佢屋裡早以嗰榮光。「三代尚書第」牌坊係為到宋應星嗰太公宋景做嗰，宋景嗰爺宋迪嘉、公公宋宇昂也蔭封到箇隻官階。「方伯第」係為到宋應星嗰族叔宋國華做嗰，佢擔任過貴州左布政使。「世進士第」係為到宋應星嗰宋國華，同得佢嗰崽孫宋應和、宋一貞做嗰，佢三隻人都係進士及第。箇隻時期也係宋應星屋裡最烊嗰時間。

等到宋應星出世嗰許下子，宋家人屋裡着嘍一場火，屋裡嗰豪華大屋、現財同得萬捲圖書都拕燒得盡光，𠵹之後，宋家開始敗下來。箇時間宋應星嗰娘魏氏都要親自下廚、燶菜舞飯。屋裡甚至慳到夜裡捨不得點燈，魏氏也咩得烏尋水喫。宋應星就係𠵹嗰一隻破落嗰地主家庭成長嗰。

生平

早年

對於宋應星出世嗰準確時間，60年代以前都係話「未詳」、「萬曆年間」、「萬曆二十五年（1597年）左右」，連八修《宋氏宗譜》都話佢「生歿未詳」。箇可能係因為而今已經冇有宋應星嗰嫡系後人嗰緣故。1935年，歐陽成到佢嗰《江西鄉賢事略審核意見書》裡頭，利用宋應昇嗰《方玉堂全集》，推斷出「萬曆四十三年（1615年）應星年二十九歲」。𠵹也就確定宋應星嗰生年係1587年。宋應星出世嗰時間，佢爺宋國霖就係四十二歲，佢娘魏氏三十三歲。

7歲嗰時間，佢同佢兄宋應昇一下到佢俚族叔宋國祚嗰家塾裡頭讀書啟蒙。宋應星自簡哈話：「余不肖髫時，讀書於塘季公家塾者八年。」箇裡嗰「塘季公」就係叔公宋和慶。宋和慶係進士出身，佢做官歸里後就到老家開辦私塾學堂，教育全族人。私塾嗰教程分兩隻階段。起先係啟蒙階段，學生會學《千字文》、《百家姓》、《龍文鞭影》箇滴子教材，末後就會開始學平仄、作文同到經書等內容。教書先生會讓學生到學堂裡一日到夜嗰讀書、背書、作文。宋國祚規定一隻學生每日上晝要讀生文七篇，接得要背下來。

《長庚公傳》話宋應星「公少靈芒，眉宇逼人，數歲能韻語。」宋應星到學堂念書嗰時間，佢時常好晏起床，咁佢都能一刻時背完七篇文章。箇係因為佢睏覺嗰時間，佢兄到佢身邊背書，佢也就同時到心裡頭默記下來。1597年，11歲嗰宋應星讀完第一階段。佢仰上開始第二階段，研讀四書五經等儒家經典。宋應星花費大概4年嗰時間讀完第二階段（到1601年），箇時間學堂換嘍隻新老師，佢就係新建舉人鄧良知。

讀書嗰同時，宋應星哈歡喜同佢兄宋應昇幾隻人佮伴旅遊。像縣城北首嗰獅山、西北50里路嗰越王山、西首120里嗰百丈山都係佢俚時常去嗰地方。

大概到1601年，宋應星到北鄉學塾以優異成績卒業，獲得童生嗰資格。後背佢同佢兄宋應昇參加縣學考試，都成功成為奉新縣學嗰廩生。佢俚每隻月有六斗廩米嗰生活補助。佢到1611年修完學業。箇段時間佢要學除吥四書五經之外嗰，諸子百家、歷代史書等教材。1619年，宋應星順利通過縣學主持嗰歲考，搦得參加鄉試嗰資格。

1615年，29歲嗰宋應星同佢兄宋應昇到南昌參加鄉試，箇年參加鄉試嗰江西士子有一萬多人，中舉嗰單就109人，宋應星名列第三，宋應昇列第六。兩隻人同時中舉，許時間拕稱做「奉新二宋」。鄉試嗰獲利，讓兄弟二人決定第年就去北京二月嗰會試，宋應昇為此哈作詩話：「我年三十餘，足不出州黨。每每覽輿圖，時時寄夢想。吾弟亦復然，遐征從北舫。」佢俚兄弟二人，約正涂紹煃、姜曰廣、李光倬箇幾隻朋友一道哩去北京。佢俚從奉新陸行到南昌，到南昌碼頭坐船到鄱陽湖，接嘚由九江嗰湖口坐船順長江東下一徑到南京，之後到鎮江沿嘚京杭大運河到北京。二月嗰會試到箇月九號、十二號同、十五號正式舉行，結果二隻主考跟房考韓光枯，同到一幫考生都賄賂舞弊，𠵹宋氏兄弟冇到榜上尋到自簡嗰名子，之後佢伓就仰上返贛嘍。1617年-1618年，佢两人到江西第一學府——白鹿洞書院進修，洞主舒曰敬任教。

1619年、1623年、1627年、1631年，接到嗰幾場大試宋家兄弟也都冇過關。箇時間宋應星已經45歲嘍。佢接得一考再考都一徑失利，佢就對自簡話「為方萬里中，何事何物不可聞」，咁也打消嘍佢接得應試嗰想頭。

晚年

1604年，宋家兄弟各自分產分家。多年嗰科舉花費太多同到屋裡人口嗰不斷增多，故係宋應星覺得係時間尋腳事做嘍。佢兄宋應昇到1631年最督一次會試失敗後，決定留嘚北京，候吏部選職。第年佢當上浙江桐鄉縣令。1634年，宋應星也出任分宜縣教諭。教諭係隻不上品嗰文職官員。《分宜縣誌·職官志》對佢嗰記載係：「宋應星，奉新人，舉人。崇禎七年任，升汀州府推官，有賢聲，汀人肖像祀之。」宋應星做教諭一徑做到1638年。箇期間佢受到分宜縣令曹國祺嗰支持，到1636年3月出版萬言政論集《野議》，佢係佢一夜時間寫正嗰。末後也哈整理發表佢嗰自選詩集《思憐詩》，同到《畫音歸正》、《原耗》兩本書，但後頭嗰兩本書已經亡佚。公元1637年，宋應星出版佢名垂青史嗰重要作品《天工開物》。

《天工開物》嗰序言裡頭話：

“

年來著書一種，名曰《天工開物卷》。傷哉貧也！欲購奇考証，而乏洛下之資；欲招致同人商略贗真，而缺陳思之館。隨其孤陋見聞，藏諸方寸而寫之，豈有當哉？ 吾友涂伯聚先生，誠意動天，心靈格物。凡古今一言寬這嘉、寸長可取，必勤勤懇懇而契合焉。昨歲《畫音歸正》由先生而授梓。茲有後命，複取此卷而繼起為之，其亦夙緣之所召哉！ 卷分前後，萬貴五穀而賤金玉之義。《觀象》、《樂律》二卷，其道太精，自揣非吾事，故臨梓刪去。丐大業文人棄擲頭，此書於功名進取毫不相關也！時崇禎丁丑孟夏月，奉新宋應星書於家食之問堂。

”

箇裡頭就話到下頭幾場事。：

1. 宋應星嗰書齋叫「家食之問堂」
2. 宋應星寫作嗰目的係重視農產、輕視金財，不係搦到當官嗰看嗰
3. 《天工開物》嗰出版時間係1637年4月（夏曆）
4. 《天工開物》、《畫音歸正》都係宋應星嗰朋友涂伯聚資助嗰
5. 《天工開物》嗰原稿先頭係有《觀象》、《樂律》兩篇。但宋應星覺得佢俚專業傷嘍，故係刻板印梓嗰時間就刪吥嘍。

1637年6月，宋應星寫正佢嗰《卮言十種》嗰第八種《論氣》，9月寫正第九種《談天》。1638年後佢嗰教諭任期期滿，但佢考列優等，就升任福建汀州府推官，箇係隻正六品嗰刑獄司法官。箇段時期嗰歷史記載係：

“

尋升汀州理刑廳。海賊為禍，公馘厥罪魁，餘孽盡宥。旋復匿於島汊生事。事覺，督撫責公養奸。公願隻身往擒，督撫代為危，欲助以兵，公不從，竟單騎直抵賊穴，諭以大義。賊駭且愧，頂爐香以迎，群願洗心輸誠。公焚巢以散其黨。督撫以事聞，遷亳州知州。

”

1640年，宋應星冇等汀州府推官任期結束就辭官歸里。1642年-1643年，奉新爆發李肅十、肅七帶領嗰紅巾軍之亂，宋應星就跟兵備道陳起龍、司李胡時享一下鎮壓嘍箇場民亂。

1643年，宋應星出任安徽毫州知州，正五品級，箇係宋應星一生當到嗰最高級別嗰官嘍。擔任知州嗰時期，中國已經係戰亂頻頻。宋應星嗰官衙都拕毀吥嘍，故係佢捐資重做，跟到召集離散嗰官員。之後哈買下亳州城南嗰薛家閣，準備做隻書院。第年1644年，明朝拕推翻後，宋應星就辭官歸鄉，全身退出公眾生活，佢11年嗰官宦生涯就咁結束嘍。佢箇時間哈寫正《春秋戎狄解》表示自簡嗰心境。

同年，南明到南京建立。宋應星拕推薦做滁和兵巡道跟南瑞兵巡道，但佢一心歸隱，表示推辭。明朝滅亡後，辭吥廣州知府之職嗰宋應昇同宋應星到老家重逢。1646年，宋應昇寫完兩首絕筆詩後就吞毒殉國嘍。1655年。宋應星拕陳弘緒邀請，幫佢嗰《南昌郡乘》寫篇《宋應昇傳》。

大概係1666年，宋應星過身，享年80歲，拕埋到戴家園祖墓。

著作一覽

宋應星一生都非常作興科技、文學、藝術、歷史、語文、經濟、哲學箇滴子領域嗰知識，平常也歡喜音樂、書法、圍棋、騎馬、游泳。佢有箇闊嗰興趣愛好，故係佢一生筆耕不錯，著述頗豐。而且佢成熟速度風快，箇多係因為佢平生大量遊歷，經驗豐富舞得。

下頭係宋應星嗰生平著作：

• 自然科技：
  • 《天工開物》（傳世）
  • 《觀象》（遺失）
  • 《樂律》（遺失）
  • 《厄言十種》 （遺失，佢嗰《論氣》、《談天》得傳世 ）
• 詩作：
  • 《思憐詩》（傳世，十首「思美」詩、四十二首「怜愚」詩 ）
• 政論集：
  • 《野議》（傳世）
  • 《原耗》（遺失）
• 歷史學：
  • 《春秋戎狄解》（遺失）
• 文學：
  • 《美利箋》（遺失）
• 音韻學
  • 《畫音歸正》（遺失）
• 雜文集：
  • 《雜色文》（遺失）

天工開物

詳細嗰內容請參照 天工開物

先頭，《天工開物》箇本書拕認為到中國已經絕版嘍。地質學家丁文江（1888年—1936年）介紹佢尋到箇本書嗰過程話：

“

民國三年，余奉使赴滇，讀《雲南通志·礦政》篇，其所引宋應星著《天工開物》，言冶銅法頗詳晰，因思讀其全書。次年回京，遍索之廠肆無所得。詢之藏書者，均謝不知。 惟余友章君鴻釗云，曾於日本東京帝國圖書館中一見之。乃輾轉託人就抄，年餘未得報，已稍稍忘之矣。十一年遷居天津，偶於羅叔韞先生座中言及其事。先生曰： 「是書也，余求之三十年不能得。后乃偶遇之日本古錢肆主人青森君齋中，遂以古錢若干枚易之歸。君既好此，當以相假。」於是始得慰十年嚮往之心焉。書為日本營生堂以木[村]氏兼葭堂所藏，江田益英校訂者。鋟本有明和辛卯年大江都[賀]庭鍾序，是年為乾隆三十六年。蓋據崇禎十年本翻刻，而中國今無此書，殆未嘗再版也。乃另抄副本，加以句讀。……十五年，友人章君鴻釗始從日本得其書，亦菅生堂所刻，因以校訂羅藏之殘缺。未幾，羅先生亟索原書去，云武進陶君涉園將付印于天津。今春過津，謁朱公桂辛，則新書已刻案上。

”

末後，浙江寧波嗰墨海樓嗰蔡氏藏書嗰擁有者李慶城到1951年熱天搦崇禎十年版嗰《天工開物》捐到國家公庫，晏後拕轉送北京圖書館。箇本崇禎十年版嗰《天工開物》係江西竹紙印製嗰，攏共分上中下三冊。書嗰督上寫嘚「崇禎丁丑孟夏月，奉新宋應星書於家食之問堂」，也就係1637年七月涂紹煃到南昌府頭回刊印嗰。

贛藏四書

詳細嗰內容請參照 野議、 思憐詩、 談天、 同 論氣

箇下留得嗰宋應星嗰著作哈有《野議》、《思憐詩》同嘚《談天》、《論氣》箇四本嗰明刊孤本，佢俚拕江西省圖書館弆到。箇四部著作係江西竹紙印製嗰，拕先頭嗰收藏者合訂做一冊，版框20.4公分高、12.7公分闊，半葉9行，一行21隻字。

書裡頭搉得「江西蔚挺圖書館珍藏」嗰隸體陽文正方朱印。封面用毛筆寫得：「明宋應星《野議》、《論氣》、《談天》、《思憐》 四種著作。蔚挺圖書館珍藏」箇23字。箇裡話嗰圖書館主人就係「蔚挺」新建蔡敬襄。佢到分宜尋到箇四本書，1933—1934年借得周憲民等人編纂《江西鄉賢事略·宋應星事略》，1952年拕收歸到江西省圖書館，1976年拕上海人民出版社重行鉛印出版。

思想傳播

早期

日本

17世紀嗰時間，宋應星嗰《天工開物》起首就傳到海外嗰江戶時代（1608年-1868年）嗰[日本]]，佢係由「唐船」帶到日本嗰長崎做為開始嗰。 日本國嗰本草學家貝原益軒（1630年-1714年）到佢嗰《花譜》、《菜譜》嗰《參用書目》裡頭話到《天工開物》箇本書，也可能係日本方面對宋應星嗰思想著作嗰最早嗰文字記錄。 日本學者三枝博音覺得《天工開物》大概係1687年嗰早晏滴子傳進日本嗰。 貝原益軒嗰《大和本草》（1708年）裡頭話：「登試金石上，則金銀之真偽立見分明。有名為《天工開物》一書言之甚詳。」箇之後，一大幫嗰日本學者連得引用、摘取《天工開物》嗰內容思想，像伊藤長胤嗰《名物六帖》、增田綱嗰《鼓銅圖錄》、村瀨嘉右衛門的《藝苑日涉》、草間直方的《三貨圖匯》、宇田川榕嗰《舍密開宗》等等等等，佐藤信淵更假創立「開物之學」。

1942年，三枝博音到佢嗰《支那文化談叢》裡頭話:

“

《天工開物》都係東洋嗰一部有代表性嗰技術書。箇本書話係三百多年前寫正嗰，但佢都包納從產品到工藝品製作方法嗰全套技術。光箇點佢就係無與倫比嗰書物。……「天工」係人類對應自然嗰行為、「開物」係人類按佢嗰生存利益而舞出嗰加工大自然嗰萬事萬物嗰行為，箇可以話係人類同嘚大自然嗰交流橋樑。……歐洲嗰技術書光係記錄滴子各專業嗰技術，都冇相到像《天工開物》𠵹，從農業、工業、到藝術、兵器嗰技術箇多門類嗰技藝書。

”

歐洲

17世紀嗰時間，宋應星嗰《天工開物》傳播到歐洲。法國係最頭先收藏箇本書嗰，弆嘚在法國國立圖書館。而今1637年（崇禎十年）版嗰《天工開物》攏共就有三本，一本弆嘚在北京圖書館，一本弆嘚在東京靜嘉堂文庫，一本就弆嘚在法國巴黎。

1830年起，法國漢學家史答尼斯拿·儒蓮開始搦《天工開物》翻譯成法文，佢嗰歷程係：

• 1830年，《天工開物·丹青》→《論中國嗰銀朱——翻譯自中國同時摘錄一本叫〈天工開物〉嗰技術百科全書》（Sur la vermillon chinois traduit du chinois et extrait d'un encyclopédie technologique intitulée Thien-Kung-Kai-Wu），發表到《新亞洲雜誌》（Nouveu Journal Asiatique），卷五，第205—213頁。
• 1833年，《天工開物·製墨》→《中國嗰製墨嗰方法》（Procédés des Chinois pour la fabrication de l'encre），發表到《化學年鑒》（Annales de Chimie），卷53，第308—315頁。
• 1833年，《天工開物·五金》、《天工開物·錘鍛》→《銅合金、青銅、鑼鉦》（Alliages du cuivre， cuivre blanc， gongs et tatams），發表到《化學年鑒》（Annales de Chimie），11月刊。
• 1837年，《天工開物·蠶桑》→《論植桑養蠶嗰主要中國嗰著作提要》（Resumé des principaux traités Chinois sur la culture des mûries et l'éducation des vers à soie），單行本，攏共224頁。仰上，箇本譯本拕翻譯成意大利文、德文，佢俚係Dell'art di coltivare igelsi e di governare i bachi da seta secondo il metodo Cinese、Ueber Maulbeer-baumzucht und Erzeihung der Seidenraupen，末後又接得拕翻譯成英文版、俄文版。
• 1838年，《天工開物· 彰施》、《群芳譜》卷一、《授時通考》卷69、《便民圖纂》→《中國提製蓼藍染料嗰通用方法》（Procédés usités en Chine pour l'extraction de la matière colorante du Polygonumtinctorium），《科學院院報》，卷七，第703—704頁。
• 1838年，《天工開物· 殺青》→《中國人造紙方法概述》（Déscription des procédés Chinois pour la fabrication du papier），《科學院院報》，卷十，第697—703頁。

英國生物學家達爾文（Charles Darwin）讀過儒蓮翻譯嗰《授時通考》和《天工開物》後，話佢俚係「權威著作」。

對於宋應星冶煉金屬鋅嗰技術，美國化學史家韋克斯（Mary Elvira Weeks）到佢嗰《化學元素的發現》（Discovery of the Elements）裡頭話：「中國1637年刊印《天工開物》裡頭，話到過鋅嗰冶煉法同到用途。歐洲人發明鋅嗰熔煉法前頭嗰一百年嗰時間，佢俚用嗰鋅，都係葡萄牙商人運自東方嗰。」

當代

1964年，德國嗰柏林洪堡大學嗰學者第羅（Thomas Thilo）搦《天工開物》嗰頭四章翻譯成德文，寫正佢嗰博士論文《宋應星寫個〈天工開物〉嗰頭四章論農藝同到農產品嗰進一步加工》（Die Dapitel I bis IV-Ackerbau und Weiterbearbeitung der Acebauproduked des Tian-gong Kai- wu von Song Ying-Xing）。1967年，第羅接得發表《宋應星論中國農業嗰經營》 （Song Ying-xing uberchinesische andwirtschaft）。箇都係當代外國學術界對宋應星嗰學術思想研究嗰新嗰開端。

參考資料

• 潘吉星，《宋應星評傳》，南京大學出版社，1990年，ISBN 7-305-00850-8
• 邱恆聰，《鵑花緣：宋應星之路——江西籍歷史名人傳記系列》，江西人民出版社，2003年
• 聶冷，《宋應星》，新華出版社，2003年，ISBN 750116203X
• 劉林，《宋應星和〈天工開物〉》，科學普及出版社，1987年，ISBN 7-110-00398-1
• 郭蓉、溫書貴，《實學大家——宋應星》，海南國際新聞出版中心，1996年，ISBN 7-80609-258-7
• 楊維增，《宋應星思想研究及詩文註譯》，中山大學出版社，1987年，ISBN 7-306-00063-2
• Brook, Timothy. (1998). The Confusions of Pleasure: Commerce and Culture in Ming China. Berkeley: University of California Press. ISBN 0-520-22154-0
• Needham, Joseph (1986). Science and Civilization in China: Volume 4, Physics and Physical Technology, Part 2, Mechanical Engineering. Taipei: Caves Books Ltd.
• Needham, Joseph (1986). Science and Civilization in China: Volume 4, Physics and Physical Technology, Part 3, Civil Engineering and Nautics. Taipei: Caves Books Ltd.
• Needham, Joseph (1986). Science and Civilization in China: Volume 5, Chemistry and Chemical Technology, Part 7, Military Technology; the Gunpowder Epic. Taipei: Caves Books, Ltd.
• Song, Yingxing, translated with preface by E-Tu Zen Sun and Shiou-Chuan Sun (1966). T'ien-Kung K'ai-Wu: Chinese Technology in the Seventeenth Century. University Park: Pennsylvania State University Press.