唐朝時間江西嗰行政規劃

出自維基百科
文檔:江南道.jpg

唐朝時間江西嗰行政規劃係話唐朝江西設置嗰行政規劃。箇時間江西攏共設立八隻州。編制上話,州嗰戶口有4萬以上嗰叫「上州」,州嗰戶口有2萬以上嗰叫「中州」,州嗰戶口不到2萬嗰叫「下州」,[1]故係江西八州同到佢俚嗰級別係:

  1. 洪州,上都督府
  2. 饒州,下州
  3. 吉州,上州
  4. 撫州,中州
  5. 袁州,下州
  6. 信州,上州
  7. 江州,中州
  8. 虔州,中州

建制嗰歷史[編寫 | 編寫源代碼]

唐朝嗰頭先幾年子,隋朝編制嗰「郡」一下子拕改成哩「州」,「郡太守」也跟到拕改成哩「州刺史」,「緣邊鎮守及襟帶之地,置總管府,以統軍戎」。[2]咁到公元622年,「江州總管府」同到「洪州總管府」就拕設立起來。

江州總管府下頭管到江、鄂、智、浩四隻州。公元624年,「江州總管府」又接到拕改做「江州都督府」。等到哩公元627年林士弘嗰勢力拕消滅,江州都督府也拕取消嘍。

洪州總管府起頭係管到洪、饒、撫、吉、虔、南平六隻州。公元624年,佢拕改做「洪州都督府」。公元628年。佢管到洪、饒、撫、吉、虔、袁、江、鄂八隻州。仰上「洪州都督府」拕分為上、中、下三隻等級。公元704年,改做洪、饒、撫、吉、虔五隻州。等到哩公元742年,江西各「州」拕改回「郡」,「州刺史」拕改回「郡太守」。公元758年,「州」、「郡」兩制又拕斢回頭。

公元627年,「江南道」設立。公元733年,江南道拕分做「江南東道」同到「江南西道」,「每道置采訪使,檢查非法,如漢刺史之職」。[3]江南東道嗰首治係蘇州,江南西道嗰首治係洪州。江南西道嗰下頭管到十九隻州,佢俚係:宣、歙、池、洪、江、鄂、岳、饒、虔、吉、袁、信、撫、潭、衡、永、道、郴、邵。[4]

公元755年之後,江西設立「節度使」,箇隻職務管到軍政、財政大權。咁也就出現「藩鎮割據」嗰情況,末後等情況好滴子後,「節度使」就拕改做「觀察使」。公元758年,「洪吉都防禦、團練、觀察、處置使」設立,佢「兼莫徭軍使,領洪、吉、虔、撫、袁五州」。[5]末後,信州、江州又拕加進來。公元764年,「洪吉都防禦、團練、觀察、處置使」拕改做「江南西道觀察使」,佢下頭管到洪、饒、吉、江、袁、信、虔、撫等州。[6]公元865年,「江南西道觀察使」拕改做「鎮南軍節度使」。許時間鎮守交趾嗰軍隊係北方人,佢俚不服當地嗰水土氣候,「涉氛瘴死者十七,戰無功,蠻勢蓋張」。[7]故係江西嗰鎮南軍徵兵三萬,拕派去駐防。

州嗰設立[編寫 | 編寫源代碼]

洪州[編寫 | 編寫源代碼]

公元622年,洪州設立。佢下頭管到7隻縣:南昌、豐城、高安、建昌、新吳、武寧、分寧。佢嗰州治係南昌。

饒州[編寫 | 編寫源代碼]

公元621年,饒州設立。佢下頭管到4隻縣:鄱陽、餘干、樂平、浮梁。佢嗰州治係鄱陽。

吉州[編寫 | 編寫源代碼]

公元622年,吉州設立。佢下頭管到7隻縣:廬陵、太和、安福、新淦、永新。佢嗰州治係廬陵。

撫州[編寫 | 編寫源代碼]

公元622年,撫州設立。佢起頭管到臨川、南城、邵武、宜黃、崇仁、永城、東興、將樂八隻縣。公元624年,永城、東興、將樂拕取消,佢俚同到邵武獨立建州。公元625年,宜黃也跟到取消。末後撫州嗰下頭就盈4隻縣:臨川、南城、崇仁、南豐。佢嗰州治係臨川。

袁州[編寫 | 編寫源代碼]

公元621年,袁州設立。佢下頭管到7隻縣:宜春、萍鄉、新喻。佢嗰州治係宜春。

信州[編寫 | 編寫源代碼]

公元758年,信州設立。佢下頭管到7隻縣:上饒、弋陽、貴溪、玉山。佢嗰州治係上饒。

江州[編寫 | 編寫源代碼]

公元621年,江州設立。佢下頭管到7隻縣:潯陽、都昌、彭澤。佢嗰州治係潯陽。

虔州[編寫 | 編寫源代碼]

公元622年,虔州設立。佢下頭管到7隻縣:贛、虔化、南康、雩都、信豐、安遠、大庾。佢嗰州治係贛。

腳注[編寫 | 編寫源代碼]

  1. 箇裡話嗰上中下三隻等級係根據《舊唐書·地理志》來嗰。到《新唐書·地理志》裡頭,江西八州都拕標記為「上」。
  2. 《舊唐書》,卷三十八
  3. 《舊唐書·地理志序》
  4. 《新唐書》,卷四十一
  5. 《新唐書》,卷六十八。「莫徭」係許時間湖南西首嗰非漢族地區。
  6. 《舊唐書·地理志》
  7. 《新唐書》,卷一百八十四