江西裕民銀行

出自維基百科
跳至導覽 跳至搜尋
江西裕民銀行嗰門面

江西裕民銀行1928年開張嗰一間江西嗰本土銀行。佢嗰總行拕設嘚南昌。資本定額係100萬元,官商各出一半,銀行收到25萬起,末後收盈下來嗰錢。裕民銀行先頭嗰行長係彭飛健,副行長係程達一。銀行由江西財政廳等機構籌辦,負責發行紙幣,代理金庫箇滴子業務。

1928年1月7號,江西裕民銀行正式開始營業,起頭設立兩隻分行,代理江西嗰金庫。箇年發行5角券,第年拕全部收還。箇年也發行10枚、100枚嗰銅元券,攏共發行62萬串,1932年拕減到48喇萬串,1933年拕加到80萬吊。[1]

裕民銀行嗰九江分行到1928年3月成立,資本有5萬元,發行20萬串嗰銅元票。吉安分行到1933年發行345344串嗰銅元票。

1928年1936年箇段時間裡頭,裕民銀行前後發行5角、2角同得分幣券,攏共11527936元。1941年嗰時間就達到3799喇萬。

1935年,裕民銀行設立行贛辦事處,負責贛南嗰金融市場,發行1毫、2毫、5毫券。

1935年11月,江西實行法幣嗰政策,江西裕民銀行、江西建設銀行南昌市立銀行三間銀行嗰銅元票拕停止發行,同時間拕收還銷毀。

1936年,江西省政府增添100萬嗰官股到江西裕民銀行。

1938年,江西嗰金融市場萎靡,社會上甚至搦郵票頂零錢用。因為先頭裕民、建設、市立三間銀行嗰貨幣已經破爛傷嘍,故係江西財政廳、建設廳到政府報批,准可箇三間銀行聯合發行過8000萬張5分嗰輔幣,攏共400萬。裕民銀行得到定額100萬,別嗰兩間銀行得到50萬嗰定額起,末後補還。

抗日戰爭嗰時間,江西裕民銀行嗰總行拕遷到贛州1941年拕改做官營,商股退出。1946年9月10號,受命截止帳目,改組做「江西省銀行」。

發行嗰錢幣[編寫]

江西裕民銀行發行嗰紙幣攏共有:

  • 銀元券
    • 冇年份嗰一分、五分券
    • 1932年(民國二十一年版)嗰2角、5角、1元、5元、10元券
    • 1934年(民國二十三年版)嗰1角、2角同得(直型)2毫券
    • 1935年(民國二十四年版)嗰5毫券(直票改5角)
    • 1938年(民國二十七年版)嗰5分券
  • 銅元券
    • 1929年(民國十八年版)嗰10枚券
    • 1932年(民國二十一年版)嗰10枚同得100枚券
  • 本票
    • 1945年(民國三十四年版)嗰400圓票

參考資料[編寫]

  1. 《江西經濟問題》,343頁,江西省政府,1934年