江西嗰族譜

出自維基百科
轉去: 導航

江西嗰族譜係用到記錄贛地各姓宗族嗰歷史嗰一類文書。

概論[編寫]

族譜嗰起源係遠古時間嗰父系社會傳統。中國最早嗰族譜係周代寫正嗰《世本》,佢對司馬遷嗰史學創作有過脫大嗰幫助。戰國時間寫正嗰《春秋公子血脈譜》係最早叫「譜」嗰族譜。唐朝以前嗰家譜大多係官修嗰,話係「不考人才行業,空辨姓名高下」、「有司選舉,必稽譜牒」。一徑到宋代之後,中國嗰各家氏族開始自簡修譜。私人修譜嗰行為幫得普及「尊祖、敬宗、收族」嗰儒家傳統道德。故係歷朝歷代也鼓勵民間嗰修譜活動,覺得佢「聚其骨肉,以系其身心」。

數目[編寫]

江西有大部份嗰族譜都係民間私修嗰,出版量少,保存艱難,加上歷代嗰戰火,特別係文革時間嗰「破四舊」嗰政治活動,江西有大量嗰族譜都已經散失亡佚。從古到今,江西歷史上攏共編撰過幾多族譜呷都係好難統計嗰。箇下出版嗰《中國家譜綜合目錄》裡頭登錄到嗰江西嗰族譜有556冊箇多,上海圖書館也弆到526冊。江西師範大學嗰一隻教授哈估計全贛嗰族譜,擱擱攏攏會有40000多冊。

定義[編寫]

而今留到嗰江西嗰全部宗族譜牒,絕大部份都係叫「族譜」或者係「家譜」,但同時間也有幾喇隻別嗰名子,佢俚嗰內含也不盡相同。一般認為「家」係親緣系統裡頭最細嗰單位;幾隻「家」組合成嗰、有尊長體制嗰就係「宗」;幾隻有共同先祖嗰「宗」就組成「族」,咁話嗰話,族譜嗰含義範圍就大過「宗譜」,更假大過「家譜」。[1]但宗族譜牒嗰主要維持標準係男性家族成員嗰血緣嗰傳承,故係一般來話家譜、宗譜、族譜用起來都冇許多講究。像,·洪武年間遷到湖南高安謝可安一族,佢屋裡嗰譜牒就係叫《中湘謝氏族譜》;·泰定年間遷到湖南嗰泰和劉翊聖一族,佢屋裡嗰譜牒叫《劉氏續修宗譜》;·永樂年間遷到湖南嗰廬陵易仲劍一族,佢屋裡嗰譜牒叫《易家塘易氏家譜》。

別嗰叫法哈有「支譜」、「房譜」。佢俚係話箇家人屋裡係早已從某隻地方遷來嗰,係許隻地方嗰祖譜嗰子孫譜牒。箇兩隻叫法都可以合做「支房譜」或「房支譜」。像江西後裔、今下嗰湘潭羅氏一族,佢人屋裡嗰譜牒嗰譜序有點明嗰寫:「鼓磉洲羅氏九修支譜,始遷祖應龍公,字世興,號政齋,明初由江西吉安府吉水縣熂下遷湖廣長沙府湘潭縣鼓磉洲南岸鷓鴣坪。」

歷史[編寫]

江西到上古時代都係南蠻百越嗰地盤,到春秋戰國嗰時間拕吳國楚國嗰文化影響,但箇都一徑要等得西漢時間,豫章郡拕設立,咁才開始有華夏文化嗰傳播。家族修譜嗰傳統始自兩晉南北朝,[2]但許時間都係官方修撰,私人修譜嗰風氣要等到宋朝才確立。

體例[編寫]

江西嗰族譜體式到宋代之後最終定型。廬陵歐陽修自簡纂修嗰《歐陽氏譜圖》裡頭話:「譜圖之法,斷自可見之世,即為高祖,下至五世玄孫,而別自為世」。[3]箇就係話五世做一隻圖,遴到第六世都畫隻新圖過。一隻系圖嗰格式係「凡遠者疏者略之,近者親者詳之……凡諸房子孫,各紀其当紀者,使譜互見,親疏有倫,宜視此例而審求之。」歐陽修嗰族譜體式包括譜序、譜例、世系圖、世系錄、先世考辨箇五大項。箇隻格式嗰確定也係江西嗰族譜文化嗰成熟標誌。

江西嗰大家士族注重「尊祖、敬宗、睦族」嗰價值觀念,箇裡頭「尊祖」就係話要勤修譜牒、「敬宗」係話要興做祠堂、「睦族」係話要族員和睦。一隻家族日常嗰生產、教育、人文活動舞得先頭單係記錄家族血緣關係嗰族譜,一下拕添進好多家族運作嗰詳細事例。像,·正德十五年(1520年彭澤主修嗰《長沙青山彭氏會宗譜》,佢起頭就話佢屋裡嗰始祖「旭湖公」係江西吉州廬陵人,末嗰時間帶兵征剿黄巢,年老辭官後住嘚長沙嗰青山,佢六隻崽跟嘚身邊。箇隻宗譜攏共有一册,含到譜序、跋、世系圖表,家族遷徙源流箇多內容。譜序哈係茶陵李東陽、新都楊廷和、鉛山費宏寫嗰。

通常一本族譜都含到下頭嗰幾隻要素:

  • 譜序:佢一般係有家族長者要員或當世名流寫嗰,主要介紹箇隻家族嗰世系淵源、歷史傳承、修譜歷程箇滴子信息。序跋嗰數量可能隨得修譜嗰次數嗰增加而增加。
  • 譜例:或叫凡例。佢介紹嗰係族譜嗰修撰原則、體例同到類目嗰安排理由。
  • 譜論:佢一般引用先前嗰名人名士對家族宗譜嗰言論,或者係引用皇帝嗰喻民榜、喻民詔。
  • 目錄:或叫總目,佢介紹全譜嗰大致內容、分類款項。
  • 恩綸錄:或叫恩榮錄、褒頌、誥勅、賜諭、告身。佢係記錄歷史上皇室官府對家族嗰封賞贈賜,像勅書、誥命、上諭、御制碑文、祭文、賜匾等。
  • 傳記:佢一般係對家族嗰先祖嗰贊詞傳記,哈會附添一滴子先人嗰肖像。箇類先人包括家族裡頭有名望著世或德行懿範者、節婦烈女等,記述內容可以係年譜、壽序、墓志銘、祭文、行述、碑銘等。
  • 門規家訓:箇係一隻族譜嗰重要內容。佢嗰內容相當廣泛繁雜,高安陳氏嗰《義門記》就係隻事例。
  • 典制:佢包到冠禮、笄禮、婚禮、祭禮箇滴子家族儀禮形式。
  • 墓圖墓誌:佢記錄家族墓地嗰地名、所在、四址交界。
  • 捐資名目:佢記載家族裡頭各房各派對修譜工程嗰捐資情況。
  • 世系圖:佢用圖表嗰形式表示家族歷代世系,一般係五世一圖。

參考[編寫]

  1. 楊冬荃,《家譜定義新說·中國譜牒研究》
  2. 《中華譜牒研究》,69頁
  3. 宋·歐陽修《歐陽修全集·譜例》

別嗰條目[編寫]

外部資源[編寫]