贛語嗰語法
贛語嗰語法係對贛語嗰語言性質、規律嗰體系描述。一隻語言嗰任何要素必須揸得一定嗰形式斢嘚一齊，箇一般含到「詞法」、「句法」兩項形式，即係話起正一隻詞、句嗰方法。
「老」、「阿」箇滴前綴時常拕用做人同得滴把子動植物嗰呼稱。好似「老兄」、「老妹」、「老俵」、「老公」；「阿婆」、「阿叔」、「阿嬸」。
有滴後綴有一定嗰語法意義。
- 「仔」、「俚」一般搭配體積、形狀伓大嗰物什，好似「蛾子」、「杌子」、「廈俚」、「猴俚」。若係前語素有修飾意義，使用「仔」/「俚」後綴會更假強調物什嗰細小，好似「茶腳仔」、「豬婆仔」、「狗崽仔」、「年邊仔」。
- 「頭」一般搭配方位、時間名詞。好似「下頭」、「日頭」、「灶頭」。若係搭配普通詞語，表示對象嗰數量伓多，好似「望頭」、「賺頭」、「布頭」。
- 「佬」、「婆」搭配人嗰時間有微微子嗰貶義。好似「撐船佬」、「侉佬」、「啞婆」。
- 「公」、「牯」、「婆」一般形容動物嗰雄雌性別，雀仔類用「公」、頭牲類用「牯」、「婆」用做所有雌性動物。好似「雞公」、「牛牯」、「狗婆」。另外，「公」/「牯」/「婆」也用做構成滴子冇性別區分嗰名詞，好似「鼻公」、「石頭牯」。
蠻多名詞嗰詞性伓拕限制做名詞，哈得係動詞、形容詞。好似「袋一袋米」、「西瓜有滴沙」。
| 單數 | 複數 | |
|---|---|---|
| 第一人稱 | 我（阿） | 我俚、我人、我倲 |
| 第二人稱 | 汝（倷） | 汝俚、汝人、汝倲 |
| 第三人稱 | 佢 | 佢俚、佢人、佢倲 |
| 其他 | 自家、自家人（自簡）、大家、別嗰、別嗰人、人家、人人、個個、隻隻人 | |
複數人稱嗰標記「俚、人、倲」搭配伓正一般名詞，好似單只能話「各位同志」，伓得話「同志俚/人/倲」。
第一複數人稱屬於排除式類型，是否含到聽事者要揸得上下語境分析。
指示代詞一般拕分做近指同得遠指，即「箇」同得「許」，有時間也得用「該」表示極近嗰距離。
- 指代人、物：箇隻、箇個、箇滴子、箇場、箇項、箇款…
- 指代方位：箇首、箇頭、箇端…
- 指代時間：箇時間、箇晝仔、箇刻仔、箇常間、箇陣間…
- 指代：箇樣（咁）、許樣（哏）
| 疑問內容 | 疑問代詞 | 例 |
|---|---|---|
| 事物 | 什哩、嘜嗰 | 什哩電影？ |
| 程度 | 幾…子 | 人有幾高子？ |
| 數量 | 幾多（子） | 有幾多人？ |
| 時間 | 幾久；什哩時間、幾點 | 汝等吥幾久？/汝什哩時間來？ |
| 選擇 | 曷隻、乃隻 | 曷隻西瓜會甜滴子？ |
| 人 | 曷嗰、乃嗰、什哩人 | 曷嗰話嗰？ |
| 處所 | 曷首、乃裡、什哩場化 | 佢去曷首？ |
| 情狀 | 啷 | 汝啷話哩？ |
數詞係「一」嗰時間，若係伓強調數量，佢一般會拕省略，短語單由量詞加名詞組成。好似「冇[一]下子就相到[一]隻人」。
若係對象嗰數量冇幾多子，量詞後背得附加「把子」、「子」表示數量少嗰意象，好似「斤把子肉」、「三張子紙」；或者，使用小數量詞，好似「一滴滴子」、「一屑屑子」、「一微微子」。
若係對象嗰數量伓精准且係整數嗰話，量詞前頭附加「喇」，好似「二十喇隻人」；或者，同時間使用兩款詞綴，好似「五百喇斤子穀」。
若係對象嗰數量蠻多，得使用「量詞 + 打 + 量詞」，好似「幫打幫嗰朋友」。若係對象嗰數量均一、齊整，得使用「量詞 + 打 + 量詞 + 子」，好似「綑打綑子嗰禾」。
有滴量詞非常有本地特色，好似「一搲米、一潑屎、一場事、一餐罵、一蔸菜、一封爆竹、一莝甘蔗、一捧鎖匙」。另外，萬能量詞「隻」嗰使用非常普遍，好似「一隻人、一隻地方、一隻麵包、一隻話法」。
量詞得直接搭配表示性狀嗰形容詞，好似「箇細歲嗰人」、「箇大粒嗰眼屎」。量詞哈得重複使用，好似「一間大間嗰房間」。
- 「AABB」形式：兩隻意思相近或相反嗰單音節動詞拕重疊使用，構成新嗰伓及物動詞，好似「擆擆扯扯（de-de câ-câ）、從從容容、挑挑揀揀」等。
- 「XXV」形式：一滴具有描述性質嗰動詞或冇實際意義嗰音節拕擺嘚一隻單音節動詞嗰前首，去生動化箇隻動詞嗰表現情狀、或者表示動詞嗰實現過程具有連續性跟持久性，好似「丩丩轉、蹀蹀跳、嚯嚯叫」等。
若係為得表達形容詞嗰形狀、程度伓深，得使用「AA + （滴）子」嗰形式，好似「侲侲子、黃黃子、長長子」，佢做得正定語、或係謂語。若係形容詞嗰形狀、程度加深，得到形容詞嗰前首加一隻冇具體意義嗰音節，構成偏正形容詞，好似「嗒侲、黆黃、雒長」；或重複箇隻音節，表示形狀、程度嗰更深化，「嗒嗒侲、黆黆黃」或「嗒嗒子侲、黆黆子黃」。
做狀語嗰擬聲詞搦「嗰」連接謂語使用，好似「一隻貓喵喵嗰叫」。謂語表現嗰動作持續性伓強嗰話，擬聲詞得連接「（一）下（子）」使用，好似「許隻貓喵下就上壁哩」。動作嗰持續性增強嗰時間，得使用副詞「緊」，好似「許隻貓緊喵嘚」；或使用「啊」，好似「許隻貓一夜都喵啊喵」。
【動詞 + 人體】拕用做表述外部世界刺激人體而產生嗰負面感受。好似，「愅人」，惹人著愅；「睺人」，惹人著睺；「麻喉」，舞得喉嚨發麻；「利手」，手用起來便利。
【雙賓結構】一般係拕用做表述取得、給予箇滴子動作。
- 「把 + 間接賓語 +（到）+ 直接賓語」，好似「把本書我」。
- 「動作 + 間接賓語 + 到 + 直接賓語」，好似「搦本書到我」。
- 給取意識不強烈嗰時間，「動作 + 直接賓語 + 間接賓語」，好似「佢教我語文」。
【動詞 + 得 + 賓語】拕用做表述動作嗰施力者同得受力者之間嗰趨向關係，虛詞「得」冇具體意義。好似，「我箇去喊得人來 / 箇場事啷怪得我」。
【動詞 + 得】拕用做表述動作施力者嗰能力、價值。好似，「箇隻人蠻喫得嗰 / 箇隻菜喫得滴子」。
【動詞 + 到 + 結果補語】拕用做表述動作產生嗰結果。好似，「累到死也賺伓到幾多錢」。
【動詞 + 啊 + 趨向補語】拕用做表述兩隻接連動作、或一隻動作同得佢嗰結果之間嗰趨向關係。好似，「箇衣裳洗啊就會爛吥嗰」。
【動詞 + 得 + 賓語 + 可能補語】拕用做表述動作發生、完成嗰可能性。好似，「話得佢贏 / 憡得鬼到 / 喫飯伓進 / 尋人伓著」。
【起始體】係話一隻動作已經開始。
- 搦「動詞 + 起來」或「動詞 + 上來」標記，好似，「話起來汝也算屋裡人。」
【完成體】係話一隻動作處於完成嗰狀態，搦「動詞 + 哩」（或「叻」、「嘍」、「咭」）標記。好似，「汝喫哩啵？」
【嘗試體】係話一隻動作嗰目的單只想嘗試、較下看，搦「動詞 + 下（子） + （賓語） + （看）」或「動詞 +動詞 + （賓語） + （看）」標記。好似，「等我來相下看。」 / 「我去問問佢看。」
【持續體】係話一隻動作處於持續嗰狀態。
- 搦「動詞 + 到」標記，好似，「睏到人會好過滴子。」
- 搦「緊 + 動詞」標記，好似，「我緊話佢，也冇什哩用。」
- 重複動詞，好似，「佢變變變變出隻鴿子來。 / 佢變啊變變出隻鴿子來。」
【繼續體】係話一隻動作一徑繼續發展進行。
- 搦「動詞 + 下去」或「動詞 + 落去」標記，好似，「接得等下去也係多嗰。」
- 搦「動詞 + 去」標記，好似，「喫汝嗰飯去，莫多大人嗰事。」
【始續體】係話一隻動作開始後，一徑延續冇中斷，搦「動詞 + 開」標記，好似，「事話開哩就一下話完。」
【進行體】係話一隻動作嘚某一時間段正在進行。
- 搦「動詞 + 嘚」標記，好似，「我話嘚事嗰時間汝莫吵。」
- 搦「動詞 + 起」標記，好似，「佢一日到夜壁起張面。」
- 搦「動詞 + 住」標記，好似，「開住部車望樹上磴去。」
【反復體】係話一隻動作反復發生。
- 搦「動詞 + 哩又 + 動詞」標記，好似，「我尋哩又尋，啷都尋伓到。」
- 搦「動詞 + 來 + 動詞 + 去」標記，好似，「尋來尋去，啷都尋伓到。」
- 搦「動詞 + 下 + 動詞 + 下」或「動詞 + 動詞 + 下」標記，好似，「尋下尋下，就尋得到。」 / 「尋尋下，就尋得到。」
【回復體】係話恢復先頭已經中斷嗰動作。
- 搦「動詞 + 還」標記，好似，「我搦還錢到佢。」
- 搦「動詞 + 歸」標記，好似，「佢終於曉得去歸屋裡。」
【可能體】係話一隻動作得以完成嗰可能性。
- 搦「動詞 + 得」標記，好似，「汝年紀箇大都哈行得路。」
- 搦「形容詞 + 得 + 數量詞」標記，好似，「我惟願佢年輕得一歲。」
【經歷體】強調一隻動作嗰先頭曾經發生，搦「動詞 + （賓語） + 過」標記，好似，「我駕車從來冇磴到人過。」
【序次體】強調動作嗰對象嗰參與動作嗰次序經驗，搦「動詞 + 數量詞 + 過」標記，好似，「一人一下過。」
【重行體】強調一隻動作嗰再次發生。
- 為得糾正、改進先頭嗰動作嗰話，搦「動詞 + 過」標記，好似，「衣裳要涾一到過。」
- 為得補充、完善先頭嗰動作嗰話，搦「動詞 + 湊」標記，好似，「喫碗飯湊。」
【穩定體】強調一隻動做嗰穩定狀態。
- 搦「動詞 + 定」標記，好似，「記定箇場事。」
【結束體】強調一隻動作已經完結。
- 搦「動詞 + 正」標記，好似，「話正嗰事伓著數。」
【消減體】強調一隻動作造成負面嗰結果。
- 搦「動詞 + 吥」標記，好似，「喫吥箇碗飯。」
【結果體】強調一隻動作嗰結果、影響。
- 搦「動詞 + 著」標記，好似，「火熄著哩。」
- 搦「動詞 + 當」標記，好似，「事舞當哩。」
【先行體】強調一隻動作先於另一隻動作。
- 先後關係伓強烈嗰話，搦「動詞 + 著」標記，好似，「棋汝走得著，我解下手就來。」
- 先後關係強烈嗰話，搦「動詞 + 起」標記，好似，「棋係汝走起嗰，故係贏我一腳。」
【判斷句】描述一個動作同得佢嗰結果，謂語得附加「好」表示規勸、警示嗰意義。好似，「做吥作業嗰好，放假也就一心一頭」。
【主動句】得使用「動詞 + 賓語」結構，好似「我喫吥箇碗飯，姆媽正放我出門」。但話題優先句式嗰使用更占贏手，即「賓語 + 動詞」好似「我飯喫了後，姆媽正放我出門」。若係賓語成份有滴複雜，也得使用「搦 + 賓語 + 動詞」，好似「等我搦許一藍邊碗嗰飯喫了，姆媽正放我出門」。
【被動句】一般使用「賓語 + 動詞」結構，好似「衣裳舞厊厏哩」。若係有明確嗰動作施力者，得搦「拕」或「等」做為引出標記，好似，「衣裳拕佢舞厊厏哩」 / 「酒店等人包場哩」。
【比較句】拕分做等比句、差比句兩類。
- 等比句
- 使用「甲 + 同/跟 + 乙 + 樣 + 形容詞」結構。好似，「汝同佢樣大」。
- 使用「甲 + 好似 + 乙 + 樣 + 形容詞」結構。好似，「汝好似佢樣喫價」。
- 使用「甲 + 有 + 乙 + 咁/許 + 形容詞」結構。好似，「汝有佢咁大」。
- 使用「甲 + 當得 + 乙 + 咁/許 + 形容詞」結構。好似，「汝當得佢許喫價」。
- 差比句
- 使用等比句嗰否定形式。好似，「汝冇佢許大」。
- 使用「甲 + 形容詞 + 乙 + 補語」。好似，「汝大佢一歲」。
- 使用「甲 + 形容詞 + 過 + 乙」。好似，「舊年熱過今年」。