承宣布政使

出自維基百科

承宣布政使江西兩代嗰行政方面嗰最高長官。佢負責搦政令宣傳到各府、州、縣、廳,故係叫「承宣布政使司 布政使」。佢也有「藩司」、「方伯」箇滴子花名。

歷史·沿革[編寫 | 編寫源代碼]

《歷代職官表·簡釋》裡頭話:

明代既不能不於府、州之上定一最高級之行政區,又不能不防止離心之傾向,因而特設布政使司。……使其專任方面,而不臨民;且以都指揮使主軍務、按察使典糾劾刑名,而布政使復分為左右,以防其專擅。

1376年,明·太祖皇帝為到防止地方掌管會專權滋事,就撤吥行中書省,建立承宣布政使司,下頭接得設立三司,即承宣布政使司、提刑按察使司、都指揮使司。明朝嗰時間嗰巡撫不係常設職務,故係布政使係江西嗰首領官。明朝嗰末期,兩江總督江西巡撫嗰權力逐漸增大,故係布政使單就管到經理錢糧箇滴子嗰事務。清朝嗰時間,佢拕確定係督撫嗰屬官,專管全贛嗰財賦、民政。

官階·品秩[編寫 | 編寫源代碼]

清朝嗰時間江西一下設立巡撫、總督,𠵹布政使就係督撫嗰屬官。1748年,布政使嗰政治品級正式拕確定,話「督撫總制百官,布、按二司皆其屬吏,應首列督、撫,次列布、按。」

行文嗰時間,藩司寫得督撫,要話「詳」,叫自簡「本司」;督撫寫得藩司就話「札飭」。

布政使係從二品官,位到巡撫嗰下頭。清朝時間嗰官制,布政使嗰出缺要開列具題,按例由按察使升任。

職務·權力[編寫 | 編寫源代碼]

  1. 承宣政令:布政使搦上級嗰政務、法令宣達到嗰府、廰、州、縣。督促佢俚貫徹實施。
  2. 管理屬官:布政使官吏府、州下頭嗰各級官員,按期搦得佢俚俸祿,考核政績,接得上報督撫。
  3. 掌控財賦:布政使負責徵收全贛各地嗰賦稅,負責財政收支。十年裡頭會統計一道全贛十三府嗰戶籍、稅役、民數、田數箇滴子民事內容。
  4. 三年賓興,提調考試
  5. 參議政務,督撫帶得佢,同得學政、藩司、臬司一下會議進行。

屬官·機制[編寫 | 編寫源代碼]

承宣布政使嗰衙署就係「承宣布政使司」,佢下頭設有各類內部機構、屬官。

  • 經歷司 經歷
佢係從六品嗰品秩。清朝嗰時間,佢係由兵馬司副指揮、京府經歷、布政司都事、按察司經歷、鹽運司經歷或州判箇滴子官員升任來嗰;佢自簡就得升任光祿寺署正、知州或外府通判。
佢職掌出納文移箇滴子事務,係布政使司嗰衙署裡頭嗰首領官,總理署內嗰各類事務。清朝嗰時間,江西攏共設立1隻經歷司經歷。
  • 照磨所 照磨
佢係從八品嗰品秩。清朝嗰時間,佢係由按察司照磨、府照磨、同知照磨、通判照磨升任來嗰;佢自簡就得升任布政司都事、州判、按察司知事或外縣縣丞。
佢職掌照刷宗卷箇滴子事務。清朝嗰時間,江西起頭設立照磨所照磨,1699年拕廢吥嘍。
  • 理問所 理問
佢係從六品嗰品秩。清朝嗰時間,佢係由兵馬司副指揮、京縣縣城、京府經歷、布政司都事、鹽運司經歷、州判、外縣縣丞升任來嗰;佢自簡就得升任光祿寺署正、兵馬司指揮、知州或外府通判。
佢職掌勘核刑名箇滴子事務。清朝嗰時間,江西攏共設立1隻理問所理問,起頭哈設得副理問,係從七品嗰官,1699年拕廢吥嘍。
  • 都事
佢係從七品嗰品秩。清朝嗰時間,佢係由州判、外縣縣丞、布政司照磨升任來嗰;佢自簡就得升任兵馬司副指揮、外縣知縣、布政司經歷、布政司理問、州同或按察司經歷。
佢同得經歷司經歷一下職掌出納文移箇滴子事務。
  • 庫大使
佢係從八品嗰品秩。清朝嗰時間,佢係由舉人候補知縣揀補來嗰,佢自簡就得升任兵馬司副指揮、京縣縣丞、外縣知縣、按察司經歷、鹽運司經歷或州判。
佢職掌庫藏賬籍箇滴子事務,係隻雜職。清朝嗰時間,江西攏共設立1隻庫大使,起頭哈設得庫大使副使,末後拕廢吥嘍。

另外,江西布政使司設過「檢校」箇隻職務,佢負責檢查校對公事文牘,末後拕裁撤。別嗰滴子雜職哈有「典事」、「攢典」,佢俚負責協助各司、所辦理業務。

參考資料[編寫 | 編寫源代碼]

  • 劉子楊,《清代地方官制》,紫禁城出版社,1988年