三苗
三苗係江西人嗰一支先人，佢俚生活到3000喇年前嗰贛鄱流域，憑得贛內嗰山川之險、水路之便，聚集四方百族，建正一隻負陸面誨、勢力廣被、聲威遠播嗰酋邦王國。佢同許時間嗰華夏人、東夷人形成三足鼎立嗰場面。
三苗嗰古都可能係位到「紫桑、彭洋之間」。[1]但也有話法，話三苗人「三徙其都」，起頭係筠州（今下嗰高安），末後遷到湖北嗰興國軍、武昌。[2]先頭到新淦拕發現嗰大洋洲古墓裡頭尋到大量、豐富嗰青銅器，有禮器、樂器、銅犁等體現社會階級嗰工具，故係佢托認為係早以三苗嗰王陵所在。
《戰國策·魏策一》裡頭話：「昔者三苗之居，左彭蠡之波，右有洞庭之水，文山在其南，而衡山在其北。」箇裡嗰「彭蠡」就係鄱陽湖，「洞庭」就係洞庭湖，箇也就係話三苗嗰勢力範圍係江西、湖南箇滴子區域。元·黃鎮成嗰《尚書通考》也話：「三苗之國，左洞庭，右彭蠡，今江州、鄂州、岳州三苗之地也。」箇話嗰就係贛北、鄂南、湘東箇滴子地面。
揸得《尚書》、《山海經》、《竹書紀年》箇滴子古書嗰話法，三苗人早晏同到中原嗰黃帝、堯、舜、禹相互挭仗。蚩尤可能就係三苗人早期嗰酋長。涿鹿之戰後，蚩尤拕皇帝擒殺，但「天下咸謂蚩尤不死，八方萬邦皆為殄服」。[3]三苗人接得揮兵北征，拕堯短嘚在丹水之浦。到舜嗰時間，三苗人同嘚中原人換和，但晏滴子又挭起仗來。之後三苗內部分裂、政治不和，「天雨血，夏有冰，地坼及泉…」，等禹短得箇隻機會一下攻滅吥嘍。[4]
三苗係穀類文化嗰創造者。長江流域「江水肥仁而宜稻」，[5]7000多年前嗰萬年就存在嘚仙人洞文化。別嗰像修水嗰山背文化、樟樹嗰樊城堆文化都普遍性嗰尋到農業稻作嗰文化遺跡。箇就係話5000年前嗰贛鄱大地已經產生發達嗰農業文明嘍。食物源嗰充分保障，舞得三苗嗰農副業生產、加工同嘚手工業都相應嗰快速發展。箇下拕浸到鄱陽湖裡頭嗰都昌城頭山地區早以就係隻經濟、文化繁榮嗰古城。三苗人到宗教、哲學、天文曆法、工藝技術箇滴子領域都有非常大嗰建樹。
三苗係青銅文化嗰開山祖。而今嗰考古學界認同贛鄱區域係上古南方印紋陶文化嗰核心地。江西內裡豐富嗰銅礦資源，讓三苗贏盡先天優勢。蚩尤就係冶銅、煉銅做兵器嗰發明者。古書裡頭話佢係「銅頭啖石」嗰怪物，箇也就話明佢挭仗時間嗰盔甲裝備嘍。有人覺得，舜、禹同嘚三苗人作戰，可能係為到搶奪江西嗰銅錫資源，戰爭嗰主戰場話不定就位到贛北。[6]箇下拕發現嗰吳城文化、瑞昌銅礦遺址就拕證明，許時間嗰江西有非常興旺、先進嗰銅礦產業。
- 張英明，《三苗文化是贛文化古老的源頭》，《江西社會科學》，1994年
- 萬建中，《江西境內三苗氏史蹟考述》，《江西社會科學》，12004年