贛江
出自維基百科
贛江係長江嗰一隻支流，佢橫穿江西，係江西最大嗰河。贛江一年嗰流量都要大過黃河，但係佢一年落嗰雨不均勻，故係贛江嗰河床不深，箇就礙到了航運嗰發展。
贛江嗰源頭係東邊武夷山黃竹嶺嗰貢水，佢係綿水跟湘水匯成嗰。贛江另外一隻源頭係出自大庾嶺嗰章水。章、貢兩條河到贛州匯到後就叫贛江嘍。箇時間嗰贛江往北流，路過吉安、樟樹、豐城跟南昌，末了就係鄱陽湖嘍。贛江全長991公里，佢嗰支流長751公里，總共嗰流域面積8.35萬平方公里。
贛州跟新淦拿贛江分成三份，贛州上面係贛江嗰上游，箇裏盡係山地，主要嗰河有湘水、濂江、梅江、平江、桃江、上猶江等等，佢俚最後還係統統匯到了章水跟貢水裏頭。贛州到新淦箇段係贛江嗰中游，起頭水流非常急，接到到嘍吉泰盆地就緩多了。箇時間主要有東西兩頭嗰孤江、遂川江、蜀水、禾水、瀧水匯進來。新淦下面就是贛江嗰下游嘍，箇裏冇有幾多山，所以水不太急，箇段匯進來嗰有袁水和綿河。
整個贛江流域氣候都還要的，雨落得非常勤，一年能有1400～1800毫米。好幾年嗰平均年徑流量達到687億立方米，水能嗰蘊藏量能有360萬千瓦。100～300噸嗰船在幹流上面都可以常年通行。贛江上就有江西最大嗰水電站-萬安水電站。
