古羅馬嗰貨幣

古羅馬嗰貨幣係話由羅馬共和國到羅馬帝國嗰西半部份，即公元前4世紀-公元11世紀箇段時間裡頭建立嗰金屬貨幣體制。佢攏共有金質嗰奧婁斯、銀質嗰德拿留斯、青銅質嗰色斯特州斯同得都潘州斯、黃銅質嗰阿斯箇滴子貨幣。古羅馬嗰貨幣到拕希臘影響嗰地區都係通行得正嗰，嘜呷佢俚有自簡嗰貨幣系統。

公元3世紀過後，德拿留斯拕安鐸尼年努斯頂替，末後安鐸尼年努斯自簡也到貨幣改革裡頭拕銀質嗰阿根透斯、青銅質嗰霍利斯頂替吥位置。箇之後，羅馬帝國嗰主要貨幣都係金質嗰所利都斯同得別滴子青銅質地嗰細零毫子。

羅馬共和國

初期

公元前400年嗰時間，古羅馬人廢棄吥一徑採用嗰物物交換嗰貿易形式，也冇接得使用古希臘嗰貨幣，而係建立起自簡嗰一套貨幣系統。佢俚頭先做出青銅砣子樣嗰貨幣——早期阿斯，佢冇有特定嗰形狀，冇有任何嗰官印、價值嗰標記。佢俚重幾多就抵幾多，箇下尋到嗰早期阿斯嗰重量位到0.5到3公斤之間。末後到公元前280年前後，開始做出青銅餅樣嗰重型阿斯。佢上頭標嘚貨幣嗰價值，標準重量係324克，守城門神耶努斯（Janus）嗰雙面相也拕刻嘚上頭。一隻阿斯嗰重量體現佢嗰價值，第一次步匿戰爭（Punic War，公元前264-241年）後，為到裝備佢嗰軍事部隊，古羅馬搦阿斯嗰重量減到290-280克左右。公元前225年前後嗰阿斯嗰後背哈拕刻嘚古羅馬兵艦頭嗰紀念圖案。

第二次步匿戰爭（公元前264-241年），古羅馬嗰軍事開銷脫大，故係佢搦阿斯熔烊來做成餅狀，一隻有20喇克。別嗰常用貨幣哈有抵得兩隻半阿斯嗰色斯特州斯、抵得兩隻阿斯嗰都潘州斯、抵得半隻阿斯嗰杉美斯、抵得四分之一隻阿斯嗰卡䋎斯。箇滴子錢都係搦青銅做嗰。

後期

古羅馬嗰貨幣體制拕改革轉型。公元前211年，銀質貨幣德拿留斯拕投入使用，佢抵得10隻530克嗰阿斯。一隻德拿留斯重4.5克，𠵹就算得許時間嗰銀、銅比價係1/120。

公元前170年前後，德拿留斯開始貶值，佢嗰重量拕減到3.96克。（箇時間銀、銅比價係1/70）

公元前2世紀嗰時間，色斯特州斯頂吥阿斯嗰地位，成為流通貨幣，許時間嗰支出、收入、財產都係搦色斯特州斯計算嗰。

公元前140年嗰時間，古羅馬嗰貨幣比價係1隻德拿留斯抵得16隻阿斯，1隻色斯特州斯抵得4隻阿斯。

羅馬帝國

穩定時期

屋大維大帝執政後，羅馬帝國保持哩多過兩隻世紀嗰穩定時期。金質貨幣奧婁斯等凱撒大帝當位後就開始流通使用，佢抵得25隻德拿留斯。

黃銅做嗰色斯特州斯抵得四分之一隻德拿留斯，佢嗰直徑係33毫米，係許時間嗰貨幣之王。

羅馬帝國嗰皇帝歡喜搦自簡嗰頭像刻嘚貨幣上頭。貨幣嗰正面係滴子神祗、頭牲、建築、屬地嗰代表圖案，背面係紀念羅馬皇帝嗰生平功績。一隻皇帝能得有好幾款不同嗰貨幣紀念圖案，一滴子皇后、皇子有時間也得刻嘚錢幣上頭。

政亂時期

公元2世紀嗰前後，羅馬帝國發生政治紛爭，𠵹帝國嗰貨幣也跟嘚貶值。Septimius Severus大帝當政嗰時間（公元193年-211年），德拿留斯嗰銀含量由70%拕降到50%。公元215年左右，Caracalla大帝為到供養佢嗰兵士，就發行新款貨幣安鐸尼年努斯，佢有一隻半德拿留斯許重，含到50%嗰銀。

新款嗰貨幣冇一刻時就拕滴子皇帝廢吥嘍，要不就係冇鑄造幾多，但皇帝緊係會發行新嗰貨幣，貨幣嗰也緊係變得不抵錢。公元3世紀嗰無政府時期，造幣廠嗰數量拕增添蠻多，加上政治嗰不穩定，故係羅馬帝國嗰貨幣體系搖搖欲落。貨幣老係貶值，裡頭含嗰珍貴金屬也不斷減少。

等公元258年，Valerian大帝執政嗰時間，安鐸尼年努斯就盈20%嗰銀含量嘍，帝國嗰機構就開始到貨幣嗰外頭鍍銀，覺得𠵹就得增加滴子佢俚嗰價值。Claudius Gothicus大帝嗰當政期間，安鐸尼年努斯嗰銀含量都冇到3%-4%，𠵹箇款貨幣同得別嗰青銅貨幣都冇什哩差別嘍，抵得八分之一隻安鐸尼年努斯嗰色斯特州斯幾乎都冇鑄造嘍。公元271年，Aurelian大帝著手羅馬帝國嗰貨幣改革，佢添加安鐸尼年努斯嗰重，故係箇隻貨幣拕叫做Aurelianus。佢也一下發行過黃銅嗰阿斯同得色斯特州斯。

公元290年嗰前後，Diocletian大帝跟得改革貨幣制度，佢引進一款新嗰貨幣——霍利斯，佢係合金貨幣，要重過安鐸尼年努斯。阿根透斯也同時間拕引入，佢名子嗰字面就係暗示嘚話銀質貨幣嗰全新回歸。末後Constantius Chlorus大帝哈發行金質嗰所利都斯，箇也意味嘚奧婁斯拕正式頂替吥嘍。

改革時期

公元311年嗰前後，Constantius Chlorus大帝舞出金質嗰所利都斯，佢有4.5克箇重，佢名子嗰字面就係保證嘚佢嗰幣制穩定性，箇係因為許時間羅馬帝國到別嗰異教寺廟裡頭搦得大量嗰黃金儲備。到大嗰環境下，幾乎所有嗰貨幣都風快嗰變得不抵錢，冇發行幾久嗰霍利斯都係一樣嗰，𠵹所利都斯就變做帝國嗰安全信用貨幣，重要嗰交易都用嘚佢，像兵士嗰軍餉、商業嗰稅收、蠻邦嗰進宮等等。所利都斯嗰次等幣值也一下拕制定，像抵得半隻所利都斯嗰杉美斯，三分之一隻所利都斯嗰展斯。

所利都斯嗰4.5克嗰規定重量由羅馬帝國一徑維持到拜占庭帝國。公元11世紀嗰時間，所利都斯開始貶值，佢保持嘚將近7隻世紀嗰穩定幣值。

貨幣比價

羅馬共和國嗰早期嗰貨幣價值
	德拿留斯	色斯特州斯	都潘州斯	阿斯	杉美斯	展斯	卡䋎斯	群昆斯
德拿留斯	1	4	5	10	20	30	40	24
色斯特州斯	¹⁄₄	1	1 ¹⁄₄	2 ¹⁄₂	5	7 ¹⁄₂	10	6
都潘州斯	¹⁄₅	⁴⁄₅	1	2	4	6	8	4 ⁴⁄₅
阿斯	¹⁄₁₀	²⁄₅	¹⁄₂	1	2	3	4	2 ²⁄₅
杉美斯	¹⁄₂₀	¹⁄₅	¹⁄₄	¹⁄₂	1	1 ¹⁄₂	2	1 ¹⁄₅
展斯	¹⁄₃₀	²⁄₁₅	¹⁄₆	¹⁄₃	²⁄₃	1	1 ¹⁄₃	⁴⁄₅
卡䋎斯	¹⁄₄₀	¹⁄₁₀	¹⁄₈	¹⁄₄	¹⁄₂	³⁄₄	1	³⁄₅
群昆斯	¹⁄₂₄	¹⁄₆	⁵⁄₂₄	⁵⁄₁₂	⁵⁄₆	1 ¹⁄₄	1 ²⁄₃	1

屋大維時期嗰貨幣價值
	奧婁斯	奎那留斯奧婁斯	德拿留斯	奎那留斯	色斯特州斯	都潘州斯	阿斯	卡䋎斯
奧婁斯	1	2	25	50	100	200	400	1600
奎那留斯奧婁斯	¹⁄₂	1	12 ¹⁄₂	25	50	100	200	800
德拿留斯	¹⁄₂₅	²⁄₂₅	1	2	4	8	16	64
奎那留斯阿根透斯	¹⁄₅₀	¹⁄₂₅	¹⁄₂	1	2	4	8	32
色斯特州斯	¹⁄₁₀₀	¹⁄₅₀	¹⁄₄	¹⁄₂	1	2	4	16
都潘州斯	¹⁄₂₀₀	¹⁄₁₀₀	¹⁄₈	¹⁄₄	¹⁄₂	1	2	8
阿斯	¹⁄₄₀₀	¹⁄₂₀₀	¹⁄₁₆	¹⁄₈	¹⁄₄	¹⁄₂	1	4
卡䋎斯	¹⁄₁₆₀₀	¹⁄₈₀₀	¹⁄₆₄	¹⁄₃₂	¹⁄₁₆	¹⁄₈	¹⁄₄	1

底厄勒斯時期嗰貨幣價值
	所利都斯	阿根透斯	南母斯	納第壓	Laureate	德拿留斯
所利都斯	1	10	40	200	500	1000
阿根透斯	¹⁄₁₀	1	4	20	50	100
南母斯	¹⁄₄₀	¹⁄₄	1	5	12 ¹⁄₂	25
納第壓	¹⁄₂₀₀	¹⁄₂₀	¹⁄₅	1	2 ¹⁄₂	5
Laureate	¹⁄₅₀₀	¹⁄₅₀	²⁄₂₅	²⁄₅	1	2
德拿留斯	¹⁄₁₀₀₀	¹⁄₁₀₀	¹⁄₂₅	¹⁄₅	¹⁄₂	1

羅馬帝國嗰尾期嗰貨幣價值
	所利都斯	美利阿能斯	司利夸	霍利斯	南母斯
所利都斯	1	12	24	180	7200
美利阿能斯	¹⁄₁₂	1	2	15	600
司利夸	¹⁄₂₄	¹⁄₂	1	7 ¹⁄₂	300
霍利斯	¹⁄₁₈₀	¹⁄₁₅	²⁄₁₅	1	40
南母斯	¹⁄₇₂₀₀	¹⁄₆₀₀	¹⁄₃₀₀	¹⁄₄₀	1

**阿納斯塔修斯一世時期嗰貨幣價值**
	所利都斯	霍利斯	半霍利斯	Decanummia	Pentanummia	Nummiae
所利都斯	1	420	840	1680	3360	16,800
霍利斯	¹⁄₄₂₀	1	2	4	8	40
半霍利斯	¹⁄₈₄₀	¹⁄₂	1	2	4	20
Decanummia	¹⁄₁₆₈₀	¹⁄₄	¹⁄₂	1	2	10
Pentanummia	¹⁄₃₃₆₀	¹⁄₈	¹⁄₄	¹⁄₂	1	5
Nummia	¹⁄_16,800	¹⁄₄₀	¹⁄₂₀	¹⁄₁₀	¹⁄₅	1

貨幣文化

起先，古羅馬嗰貨幣係到Juno Moneta神廟鑄造嗰，今下西方語言裡頭嗰「錢」都係源自廟嗰名子Moneta，像英語嗰money、法語嗰monnaie。
阿拉伯國家嗰貨幣名子第納爾（دينار）係德拿留斯嗰字源。
古羅馬嗰貨幣嗰面值係搦羅馬數字寫嗰，佢俚同阿拉伯數字嗰對應係：

I	II	III	IV	V	VI	VII	VIII	IX	X	L	C	M
1	2	3	4	5	6	7	8	9	10	50	100	1000

古羅馬嗰貨幣嗰表面嗰字母縮寫嗰意思係：

縮寫	AVG	AVGG	CAES	COS	D	F	FIL	IMP	PM	PP	SC	TRP
正寫	AVGVSTVS / AVGVSTA	AVGVSTORVM	CAESAR	CONSVL	DIVVS / DIVA	FILIVS	FILIA	IMPERATOR	PONTIFEX MAXIMVS	PATER PATRIAE	SENATVS CONSVLTO	TRIBVNICIA POTESTATE
譯文	皇、后	皇帝	皇	執政官	神	崽	女	大勝	大神祗官	國父	議院之令	宗族之力，逐年換新

別嗰條目

江西嗰貨幣史