鹿野苑

出自維基百科
轉去: 導航
鹿野苑遺址

鹿野苑梵語:सरङ्गनाद,saraṅga-nāthá;印地語:सारनाथ,Sārnāth)係位嘚印度嗰北方邦瓦拉納西嗰北首10公里嗰一隻佛教聖地。佢係佛陀釋迦牟尼頭回講經說法嗰所在。

歷史[編寫]

佛陀講經

好似今下嗰苦行僧(sādhu)樣,季風時間或係坐夏時間(varṣaḥ)佛陀係到鹿野苑㪗腳嗰。佢起哩隻草屋做為歇息嗰居所,喊做「根本香室精舍」(Mulagandhakuti Vihara)。等僧伽人數到六十嗰時間,佛陀就派佢個俚去四塊哩宣揚佛法。

𠵹,鹿野苑成為小乘佛教正量部(Sammatiya)嗰一間重點學堂;不過飲血金剛(Heruka)同得多羅菩薩(Tārā)也到箇首有相當嗰影響勢力,箇就證明許時間鹿野苑嗰密宗也有一定分佈。當地嗰達官貴族都來鹿野苑修行佛教,故係公元三世紀鹿野苑成為一隻重要嗰文化傳播中心,末後到笈多王朝嗰時間,鹿野苑達到佢發展嗰頂峰。四世紀中國嗰法顯和尚來嗰時間相到箇塊子有四座窣堵坡(stūpa)、兩間廟,等七世紀玄奘和尚來箇時間,箇塊子已經有三十間廟、三千和尚哩。鹿野苑嗰繁榮一徑持續到波羅王朝,到1026年阿富汗嗰伽色尼王朝嗰馬哈茂德(Mahmoud)搦箇首洗劫一空。後背,鹿野苑就成為當地人撿取建築材料嗰荒地,佛教信仰也基本從印度消失。

一徑到1794年,邦政府嗰官員Jagat Singh來到已經拕誺記六個世紀嗰鹿野苑,撿走哩達摩羅吉迦塔(Dharmarājika Stūpa)嗰磚石做為佢做屋嗰材料。1798年,駐印英國人Jonathan Duncan對塔嗰遺址裡頭發現嗰一隻青石盒子發表哩一篇研究報告。1835年,Alexander Cunningham爵士到鹿野苑尋到一隻飾有碎骨、珍珠黃金石嗰空櫥子,佢搦櫥子送到孟加拉亞洲協會(Bengal Asiatic Society)研究,箇拕加爾各答嗰印度博物館收藏起來。

逢Jagat Singh發現鹿野苑以來,箇隻廢墟成為眾多探險家嗰尋寶地。1815年,C. Mackenzie上校對鹿野苑進行頭回官方挖掘。1835-1836年,A. Cunningham爵士又搦一間寺廟重現於世。1851-1852年,有考古探尋者(Archaeological Enquirer)職務嗰Kittoe少校更假發現哩好幾座窣堵坡淆一間寺廟。1904-1905年,F. C. Gertel又發現阿育王嗰正殿跟到磉柱,即「阿育王石柱頭」。落後,C. Horne(1865年)、Sir John Marshall(1907)、H. Hargreaves(1914-1915)、Daya Ram Sahni(1927-1932)都對鹿野苑進行過挖掘工作。

斯里蘭卡嗰佛教徒Anagarika Dharmapala致力於修復已經完全拕廢棄嗰鹿野苑遺址,佢四塊哩呼籲重建鹿野苑,爭取印度同西方嗰資金支持,故係正有今日嗰根本香室精舍。

遺跡[編寫]

根本香室精舍

今下嗰鹿野苑遺址有阿育王跟到阿克巴(Akbar)嗰時間做嗰建築遺跡,同得一間展示到遺址發現嗰佛教、印度教嗰雕刻塑像。團近也有佛教國家到鹿野苑新做嗰寺廟,好似緬甸中國韓國日本泰國跟到三間藏傳寺廟。

鹿野苑嗰所有古代建築都拕入侵嗰穆斯林摧毀吥哩,箇肚裡有名嗰有:

  • 達麥塔(Dhāmek Stūpa):始建於二~三世紀,七世紀擴建哩佢圓柱形嗰磚石塔體。今下佢都有35米箇高、30喇米闊。外頭係木板裝飾,𠞭有窟眼。基座係石頭牯做嗰,搦鐵釘固定。
  • 法王塔(Dharmarājika Stūpa):佢係少數經過穆斯林洗劫後,哈相得到阿育王時期嗰遺跡嗰建築。
  • 根本香室精舍(Mulagandhakuti Vihāra):佢有早以佛陀歇息嗰所在嗰遺址,哈有一間現代做起嗰新址。新址嗰外壁有日本畫家野生司香雪嗰壁畫作品。
  • 喬堪祗塔(Chaukhandī Stūpa)係阿克巴為得紀念佢爺胡馬雍(Humayun),做起嗰八角塔。
  • 阿育王柱:歷經毀壞哈一經徛住,佢嗰獅子石柱頭已經係印度嗰國家標誌。石柱頭先頭從十多米跌落來都冇損毀,箇下拕弆嘚考古博物館裡頭。

另外,鹿野苑遗址哈有一蔸Anagarika Dharmapala栽嗰菩提樹、John Marshall爵士起嗰一間博物館。箇間博物館係印度考古調查局(Archaeological Survey of India)下屬嗰至早機構,1910年開張,收藏到公元前三世紀到公元七世紀嗰文物。