美國

美國嗰所在

美國嗰國旗

美國嗰國徽

美利堅合眾國（英語：United States of America），有時間拕叫做合眾國（United States）或美國（America），係隻由50隻州同得一隻聯邦特區組成嗰立憲聯邦共和國。

美國嗰48隻州同得華盛頓特區都位到北美洲嗰中間腰，太平洋跟大西洋嗰中間，佢俚到北首同加拿大交界，到南首同墨西哥交界。阿拉斯加州位到北美大陸嗰西北頭，位到加拿大同得俄羅斯嗰中間。夏威夷州位到太平洋嗰中間心。美國哈擁有滴子海外領地、屬地。

美國嗰面積係983萬平方公里，有3億喇人，𠵹佢就係世界第3或4嗰地理大國，同得第3嗰人口大國。美國係世界上最種族、文化多元化嗰國家之一，佢有大量嗰移民來自世界上嗰好多國家。美國係世界最大嗰經濟體，2008年佢嗰國內產值係世界總和嗰23%，揸得人均購買力算嗰話就係21%。

美國係到大英帝國嗰十三隻殖民地嗰基礎上建立起來嗰。1776年7月4號，佢俚簽正《獨立宣言》（Declaration of Independence），想到大英帝國裡頭獨立出來，末後美國到獨立戰爭裡頭打贏英國，箇也係頭回殖民地獨立戰爭嗰勝利。1787年9月17號，美國確定箇下嗰聯邦憲法，佢也規定每隻州係美國中央政府領導嗰唯一共和國嗰一部份。

19世紀，美國到法國、西班牙、英國、墨西哥、俄羅斯箇滴子國家手上接連得到土地。1860年代，美國嗰南、北各州因為廢除奴隸制嗰問題挭起仗，末後北方州贏得箇場內戰。到1870年代，美國成為世界嗰頭大經濟體。接得嗰第一、第二次世界大戰讓美國成為世界軍事強國，故係佢係聯合國嗰安全理事會嗰常任理事國同得北約（NATO）嗰締約國之一。等冷戰結束、蘇聯解體，美國成為世界唯一一隻超級大國，佢嗰軍事花銷達到世界總和嗰一半左右，到經濟、政治、文化等方面也係世界嗰頭號腳。