Notting Hill

出自維基百科
Notting Hill

發行海報
导演Roger Michell
监制Duncan Kenworthy
Roger Birnbaum
编剧Richard Curtis
主演Julia Roberts
Hugh Grant
配樂Trevor Jones
攝影Michael Coulter
剪輯Nick Moore
製片商Working Title Films
發行商Universal Pictures
上映日期1999年5月21號
片長124分鐘
產地英國
語言英語
预算$0.43億
票房$3億6388萬9700
電影嗰重要拍攝地,Portobello路

Notting Hill》係1999年5月21號上映嗰一部英國浪漫喜劇電影,係嘚倫敦嗰羅町侯(Notting Hill)拍嗰。佢嗰劇編係Richard Curtis,製片係Duncan Kenworthy,導演係Roger Michell,主演係Hugh Grant、Julia Roberts、Rhys Ifans、Emma Chambers、Tim McInnerny、Gina McKee跟到Hugh Bonneville。

箇部電影得到蠻多嗰好評,係英國電影史上最賣座嗰發行影片。佢贏得英國影視藝術學院獎(BAFTA)、英國喜劇獎(British Comedy Awards)、英國音樂獎(Brit Awards)等等。

戲文劇情[編寫 | 編寫源代碼]

威廉·舍科(William Thacker,Hugh Grant飾),「威」(Will)嘚羅町侯有間自簡嗰特賣旅遊書籍嗰鋪子。佢冇幾久處理正同得佢老婆離婚嗰箇腳事,因為佢老婆跟得隻長得好似Harrison Ford嗰人走吥哩。箇下,威廉同得一隻威爾士嗰怪人史拜可(Spike,Rhys Ifans飾)分租嘚一棟屋。

有日,美國好萊塢女明星安娜·斯葛(Anna Scott,Julia Roberts飾)來佢嗰店鋪買書,兩隻人咁逢得面。冇下子,箇對人嘚街上又逢過一次湊,但威廉竳翻吥安娜手裡嗰桔子水,兩隻人嗰衣裳拕湛厊厏哩。威廉邀請安娜到佢對街嗰屋裡頭換衣裳,安娜應哩佢。換正衣裳後,安娜嘚臨走嗰時間哩威廉嗰,兩隻人嗰浪漫關係咁就開始哩。

幾日過後,威廉問史拜可收到什哩信息過啵,一徑冇什哩記性又寫不得字嗰史拜可想吥半日,末後想起有隻叫安娜嗰美國女崽子,但佢不叫自簡做「Anna」,而係叫「Flintstone」,住嘚理茲酒店,哈叫威廉去佢許裡走門。威廉到酒店嗰時間將好有場記者會,威廉拕誤認為係記者,咁拕准許入場。末後佢拕逼得採訪安娜嗰新電影《Helix》,但佢根本冇看過。箇場危機過身後,威廉邀請安娜一下去佢妹子幾日後嗰生日宴會。

嘚馬庫斯(Max,Tim McInnerny飾)同得北娜(Bella,Gina McKee飾)嗰屋裡,安娜覺得威廉嗰朋友好似屋裡人樣嗰。末後箇對人偷偷子翻進一家私人庭院。接得嗰幾日佢俚一下去影院、一下去餐館。等得安娜叫威廉去佢酒店房間嗰時間,撞到安娜嗰男朋友捷胡·景(Jeff King,Alec Baldwin飾)。安娜裝假子好歡喜相到佢,咁威廉就裝假子係房間服務生。等捷胡離開房間之後,安娜同得威廉陪失禮,因為佢以為佢俚早捖吥哩。箇時間威廉覺得自簡應該轉身走人。

冇下子,安娜跟得捷胡咄真分手哩。安娜來歸威廉嗰屋裡,準備住落來,箇時間佢也因為滴子豔照醜聞不得不尋隻場化密起來。箇對人頭一到睏嘚一齊。第日清早,威廉拕屋裡門口嗰大批記者拕嚇得哩,箇都係史拜可頭夜嘚酒吧亂嚼舞得。安娜覺得威廉背叛哩佢,故係咁走哩,威廉也決定誺記箇段情,儘管冇幾成功。

一年過後,安娜為得拍場Henry James嗰電影來歸倫敦,箇也係威廉先頭建議佢嗰。威廉來到片場,安娜邀佢徛嘚邊上相。無意中威廉通過電影聲控系統聽到安娜同得另一隻演員嗰對話,安娜話佢跟得威廉之間嗰關係冇幾熟,威廉拕氣得離開。第日,安娜又來威廉嗰書鋪,想兩隻人重歸於好,但傷心嗰威廉斷哩佢箇隻想頭。咁安娜留得威廉一樣禮物後就走哩,禮物末後拕拆開,係Marc Chagall嗰真跡《La Mariée》,箇係因為先頭安娜嘚威廉屋裡相過箇幅畫。

威廉尋來滴子朋友談詑,佢俚都支持佢同得安娜斷吥去。一徑等到史拜可來,當場罵威廉係隻「偗卵」(daft prick)。威廉仰上著醒,曉得自簡哩一生至大嗰犯錯。箇幫子人坐嘚馬庫斯嗰車子裡頭堪垃哩搔安娜。等到哩安娜嗰記者會現場,威廉𠱽得安娜留嘚倫敦陪佢。末底督,箇對人結正婚,電影最末嗰鏡頭係安娜駄哩肚,坐嘚一隻公園椅子上陪得威廉。

演員一覽[編寫 | 編寫源代碼]

電影嗰男、女主角
  • Julia Roberts 演 Anna Scott:一隻好萊塢嗰電影明星,佢嘚威廉嗰書鋪裡頭同佢逢面。Julia Roberts拕覺得係箇隻角色唯一嗰人選,但先頭Roger Michell、Duncan Kenworthy冇想到佢會接手。Roberts嗰經理人話得Roberts聽,箇係佢相過最浪漫嗰喜劇。[1]等Roberts讀過後,話佢自簡肯定要接下來。[2]
  • Hugh Grant 演 William "Will" Thacker:羅町侯嗰間書鋪嗰老闆,將腳離嗰婚。揀Hugh Grant演箇隻角色係所有人同意嗰,因為佢俚覺得Grant同得編劇Richard Curtis之間有種「命裡註定嗰『作者-演員』嗰姻緣」(writer/actor marriage made in heaven)。Michell話Grant演Curtis嗰作品要結棍過任何人、Curtis寫Grant嗰角色也要結棍過任何人,Grant係唯一一隻得完美表現Curtis嗰文字嗰演員。[1]
  • Emma Chambers 演 Honey Thacker:威廉嗰細妹、安娜嗰影迷。末後佢嫁得佢兄嗰室友史拜可。
  • Hugh Bonneville 演 Bernie:一個冇出路嗰股票經紀人、威廉嗰朋友。聚會嗰時間佢冇一眼相出安娜嗰身份,私底哩話到電影產業嗰低報酬,接得問安娜最末部電影賺得嗰錢。
  • Rhys Ifans 演 Spike:威爾士人、威廉嗰怪物室友,佢眠夢成為一隻藝術家。末後佢娶進威廉嗰妹子Honey Thacker。威廉形容佢係「世界頭上最偗嗰人,再偗過一倍湊」。
  • Tim McInnerny 演 Max:威廉嗰摯友,威廉時常同佢佮嘚一齊。佢跟到Bella備辦哩Honey嗰生日聚會。
  • Gina McKee 演 Bella:一個半身不遂嗰律師,威廉嗰舊女友。先頭佢嫁得Max。威廉話佢係一生愛過嗰兩隻女人之一。
  • James Dreyfus 演 Martin:威廉嗰書店裡頭冇路用嗰助理。

別嗰角色

  • Richard McCabe 演 Tony:不跑火嗰飯鋪老闆,主角都到佢許首碰面。
  • Omid Djalili嘚鏡頭嗰頭幾分鐘演隻銷售員。
  • Dylan Moran 演 Rufus:到Will書鋪偷書嗰賊。佢拕錄像攝到搦書弆到褲子內裡,但佢哈自簡係冤枉嗰,末後,佢又問Anna要電話號碼。
  • Alec Baldwin 演 Jeff King:Anna嗰男朋友。
  • Sanjeev Bhaskar:Anna同得Will到餐館喫飯嗰時間撞得佢評論嘚電影,佢聲氣又大話事又無聊。
  • Emily Mortimer 演 “Perfect Girl”:佢暗戀嘚Will。
  • John Shrapnel 演Anna嘚英國嗰經紀人。

拍攝製作[編寫 | 編寫源代碼]

「有時間我想曉得,若係我出現嘚我隻隻禮拜都會去喫飯嗰朋友屋裡,逢到世界頭上最出名嗰人,或係瑪當娜或係別人,箇會啷樣。全部都源自箇隻想法。我嗰朋友會啷反應?有人會裝假鎮定啵?飯會喫得啷樣?事後佢會啷跟汝解釋?」
— Richard Curtis[3]

Richard Curtis係夜裡睏嘚床上想出箇部電影嗰。佢話佢起先嗰設想係「一隻好平常嗰人出門難以相信嗰逢到一隻名人,同得咁佢俚拕影響到嗰生活」。[3]Mike Newell拕請來做導演但佢冇答應,不過佢也話自簡不後悔,儘管箇係商業上嗰一隻過錯。[4]製片人Duncan Kenworthy末後尋到Roger Michell,佢話「尋一隻好似Roger嗰導演,就好似尋到隻隻角色都合嗰演員樣艱難。Roger非常出眾。」[1]

Curtis揀Notting Hill做拍攝地點係因為佢住過許首,也瞭解箇隻場化,佢話「Notting Hill係隻熔爐,係拍電影嗰上好所在。」[5]但箇舞得製片商面對一隻人口稠密嗰地區,Kenworthy話「早先我俚想起一隻大型戶外棚,咁我俚就得控制場面,因為我俚怫出現嘚大街上嗰Roberts靠Grant會吸引幾千隻圍觀者。」末後,佢俚哈係搉定到街上拍。[5]Michell也愅「拍攝嗰頭日Hugh靠Julia一出現嘚Portobello路上,就會舞得交通堵塞,我俚也會拕幾千隻人、狗仔隊圍到,舞得電影拍不正。」地面保安人員全力防止箇隻場面,同時佢俚哈要應對當地嗰居民因為電影拍攝而變得「異常興奮」。[5]電影取點嗰負責人Sue Quinn話保證電影得以拍攝係隻龐大嗰任務。[5]Quinn同得佢嗰團隊拕逼得寫信到住地嗰幾千隻居民,保證會酬謝每隻人。[5]

「我俚逢到嗰主要問題係電影攝製嗰規模。我俚不係簡單一拍就得罷身。堪垃哩都係我俚嗰人。到倫敦嗰街頭拍電影要對面衛生、安全等問題。冇什哩道路封鎖。好得有警察靠市政嗰通力配合,佢俚樂意相到我俚嗰努力會宣傳到箇隻地區。」
— Sue Quinn[5]

製作設計人Stuart Craig樂意拍一部當代電影,佢話「我俚面對嗰係街道上幾千隻人,有商家、店家、住家,舞得場面非常複雜。」[5]1998年4月17號電影開始到西倫敦同得Shepperton工作室拍攝。[1]Will嗰書鋪位嘚Portobello路,也係電影嗰主要場景地之一。Notting Hill嗰別嗰拍攝地點包括Westbourne Park路、Golborne路、Landsdowne路跟到Coronet電影院。[5]Will嗰屋位嘚Westbourne Park路280號,係Richard Curtis嗰產業,入口嗰後背係間大屋,電影裡頭嗰套間係工作室起出來嗰。許隻藍門也拕拍賣做慈善哩,而今嗰門係烏嗰。到Notting Hill拍吥六個禮拜後,攝製組轉到Ritz酒店(只得夜裡拍攝)、Savoy酒店、Nobu酒家、Hempel酒店嗰禪園(Zen Garden)同得Kenwood屋。[5]督尾嗰一隻場景係一部電影嗰首映式,箇有滴艱難,Michell想拍Leicester廣場,但拕拒絕哩,因為警察因為Leonardo DiCaprio嗰一場首映式出哩滴子落殼,就怫共樣嗰事出現嘚箇隻首映式。經過一次衛生安全排練,攝製組拕允許到24個鐘頭之內起正、拍了箇隻場景。[5]室內場景係最末嘚Shepperton工作室拍嗰。[5]電影嗰最末剪輯係3.5鐘頭箇久,發行嗰時間拕編輯到90分鐘。[6]

電影有隻主題係Marc Chagall嗰1950年嗰《La Mariée》。Anna嘚William嗰屋裡相到箇幅畫嗰印刷版,末後就搦原版送得佢。Michell跟《娛樂週報》(Entertainment Weekly)話揀箇幅畫係因為Curtis好作興Chagall嗰作品,《La Mariée》話嗰也係對失吥嗰東西嗰哀傷。製片人為得電影舞哩隻複製品,但箇要得到畫主同得「設計靠藝術版權協會」(Design and Artists Copyright Society)嗰許可。末後,Kenworthy話「我俚決定毀吥佢。因為著得我俚嗰畫靚傷哩,佢會得會流進市場、舞出禍端。」有人估測原畫抵得50到100萬美金。[7]

電影配樂[編寫 | 編寫源代碼]

電影嗰配樂係Trevor Jones舞嗰。[8]有隻把子歌係別嗰藝術家嗰創作,好似Elvis Costello翻唱Charles Aznavour嗰《She》、Shania Twain重編嗰《You've Got A Way》同得Ronan Keating特製翻唱歌《When You Say Nothing at All》,箇首歌哈得過英國銷量頭名。Will行嘚Portobello路上播嗰係Bill Withers嗰《Ain't No Sunshine》。Tony嗰飯鋪關張許夜,佢靠Max彈嗰係鋼琴版嗰《Blue Moon》。[9]起頭,Charles Aznavour版本嗰《She》係拕用嘚電影裡頭嗰,但美國觀眾測試對箇冇什哩反響,故係Richard Curtis請來Costello翻唱箇首歌。[10]除吥美國,電影別嗰放映都含得箇兩隻版本,原聲帶也由Island Records發行。

曲目:
  1. Another Level嗰《From the Heart》
  2. Ronan Keating嗰《When You Say Nothing at All》
  3. Elvis Costello嗰《She》
  4. Charles Aznavour嗰《She》
  5. Al Green嗰《How Can You Mend a Broken Heart?》
  6. Texas嗰《In Our Lifetime》
  7. 98 Degrees嗰《I Do》
  8. Pulp嗰《Born to Cry》
  9. Lighthouse Family嗰《Ain't No Sunshine》
  10. Shania Twain嗰《You've Got a Way》
  11. Spencer Davis Group嗰《Gimme Some Lovin》
  12. Trevor Jones嗰《Will and Anna》
  13. Trevor Jones嗰《Notting Hill》
  14. Bill Withers嗰《Ain't No Sunshine》[11]

電影發行[編寫 | 編寫源代碼]

評介[編寫 | 編寫源代碼]

對箇部電影嗰評介大部分係正面嗰,爛番茄網站嗰評分係82%嗰「公認嗰新鮮」(Certified Fresh)[12]《綜藝》(Variety)嗰Derek Elley搦哩隻總體正面評價,話箇部電影樸實、偗偗子,多哩10分鐘有滴長,依架構、基調來話明顯不係《Four Weddings and a Funeral》嗰續集。[13]《激情評介》(Cranky Critic)話佢「咄真好看得會死」,係部「完美嗰約會電影」。[14]《硝酸鹽》(Nitrate)話佢新奇、明快、新鮮跟到多變,有值得珍愛、紀念嗰橋段、人物。[15]John J. Puccio看完電影嗰DVD過後話佢「係隻童話,作者Richard Curtis曉得大眾有幾歡喜童話故事」,係部「馨甜嗰電影」。[16]華盛頓郵報》嗰Desson Howe對電影嗰評介非常正面,特別表揚Rhys Ifans演嗰Spike。[17]James Sanford搦哩三隻半個星到箇部電影,「話Curtis嗰對話會得比別嗰時間打晃嗰情節要大聲,但電影嗰頭一隻鐘頭係咁咀(zê)咁滑稽,話佢盈下嗰部分冇幾好子會顯得有滴嗇。」[18]《喵喔嘰前哨雜誌》(Milwaukee Journal Sentinel)嗰Sue Pierman話箇部電影「精靈、滑稽、浪漫,喔,哈舞得人想到《Four Weddings and a Funeral》」,但佢「咁合人意,不愅人話。」[19]Roger Ebert表揚箇部電影,話佢「情節明快、對話機智,主角也好愛人。」[20]Kenneth Turan觀後感相當良好,話「電影嗰浪漫中心不拕毛病影響」。[21]CNN嗰評論員Paul Clinton話電影係「亂象裡頭關於愛嗰、滑稽又溫馨嗰少數電影之一。」[22]

《Needcoffee.com》嗰Widgett Wallsn搦哩三隻半杯咖啡到箇部電影,話佢嗰幽默「拯救哩電影嗰完全平庸、不足嗰督尾」,哈批評哩電影嗰音效。[23]Dennis Schwartz嗰「C-」負面評介話箇部電影根本係「十足嗰偗話」。[24]有人話箇部電影展示哩「不合實際、人為溫馨嗰倫敦生活同得英國怪癖」。[25]

電影首映式嗰舉行場地,Odeon電影院

排行[編寫 | 編寫源代碼]

《Notting Hill》係英國電影學院依得英國電影接受度嗰標準排嗰「世上頭一百名電影」嗰第95名。[26]

票房[編寫 | 編寫源代碼]

1999年4月27號,《Notting Hill》到Leicester廣場嗰Odeon電影院舉行首映式。[27]佢嗰英國本土票房收入達$116,089,678,全球收入達$363,889,678。[28]開映週末佢賺得$0.27億嗰收入,打破美國浪漫喜劇片嗰相關紀錄, [29][30]第個禮拜佢接得賺到$0.15億,[31]末後開始滑落。[32]播映一個月之後,佢嗰首映週嗰票房紀錄拕女主角Roberts嗰別部電影《Runaway Bride》打破。[33]佢係1999年第六高票房收入嗰電影,[34]也係到2007年4月為止,史上最高票房收入電影嗰104名。[35]許時間,佢一徑係英國嗰最高收入電影。[36]

獎項[編寫 | 編寫源代碼]

《Notting Hill》贏得2000年嗰英國電影靠電視藝術學院獎(BAFTA)嗰最受觀眾歡迎獎(Audience Award for Most Popular Film),[37]也獲得英國年度傑出電影嗰Alexander Korda獎、最佳男配角(Rhys Ifans)嗰提名。[38]佢哈贏得英國喜劇片獎(British Comedy Awards)嗰最佳喜劇片電影。[39]跟到英國音樂獎(Brit Awards)嗰最佳音效獎。[40]接到佢也獲得帝國獎(Empire Awards)嗰最佳英國電影、最佳英國導演(Roger Michell)、最佳英國男演員(Hugh Grant)。[41]末後,電影也得到金球獎嗰三隻提名:最佳「喜劇片-音樂片」電影、最佳男「喜劇片-音樂片」電影演員(Hugh Grant)同到最佳女「喜劇片-音樂片」電影演員(Julia Roberts)。[42]

參考資料[編寫 | 編寫源代碼]

  1. 1.0 1.1 1.2 1.3 About the Production。 Notting Hill.com。 到2007年5月22號尋到。
  2. A Romantic Comedy Dream Team。 Notting Hill.com。 到2007年5月22號尋到。
  3. 3.0 3.1 Behind-the-Scenes。 Notting Hill.com。 到2007年5月22號尋到。
  4. Chris Parry。 The man who told Notting Hill to 'sod off'。 eFilm Critic。 到2007年5月21號尋到。
  5. 5.00 5.01 5.02 5.03 5.04 5.05 5.06 5.07 5.08 5.09 5.10 Notting Hill, the place, the movie location。 Notting Hill.com。 到2007年5月22號尋到。
  6. Greg Dean Schmitz。 Notting Hill (1999)Yahoo!。 到2007年5月28號尋到。
  7. Joe Dziemianowicz; Clarissa Cruz (11 June 1999)。 FlashesEntertainment Weekly。 到2007年5月20號尋到。
  8. Notting Hill。 Filmtracks.com。 到2007年5月23號尋到。
  9. 'When You Say Nothing at All'。 BBC。 到2007年5月21號尋到。
  10. "Elvis alive and well in Notting Hill", 1999年7月20號.
  11. Notting Hill Soundtrack。 last.fm。
  12. Notting Hill (1999)Rotten Tomatoes。 到2010年9月18號尋到。
  13. Elley, Derek (30 April 1999)。 Notting Hill。 Variety。 到2007年5月19號尋到。
  14. Notting Hill。 Cranky Critic。 到2007年5月19號尋到。
  15. Savada, Elias (28 May 1999)。 Notting Hill。 Nitrate。 到2007年5月19號尋到。
  16. John J. Puccio。 Notting Hill [Ultimate Edition]。 DVD Town.com。 到2007年5月20號尋到。
  17. Desson Howe (28 May 1999)。 'Notting Hill': Easy to LoveWashington Post。 到2007年5月21號尋到。
  18. Error on call to Template:cite web: Parameters archiveurl and archivedate must be both specified or both omittedJames Sanford (2007年9月26號)。 Notting Hill。 Kalamazoo Gazette。 到2007年5月21號尋到。
  19. Sue Pierman (27 May 1999)。 'Notting Hill' is perfect romantic fit for Roberts, Grant。 Milwaukee Journal Sentinel。 到2007年5月21號尋到。
  20. Roger Ebert (28 May 1999)。 Notting Hill。 Chicago Sun-Times。 到2007年5月21號尋到。
  21. Kenneth Turan (28 May 1999)。 Notting Hill。 Calendar Live。 到2007年9月26號[1]保存到。 到2007年5月21號尋到。
  22. Paul Clinton (27 May 1999)。 Review: Julia, Hugh a perfect match for 'Notting Hill'。 CNN。 到2007年5月21號尋到。
  23. Widgett Walls。 Notting Hill (1999)。 Needcoffee.com。 到2007年5月21號尋到。
  24. Dennis Schwartz (29 November 2000)。 Notting Hill。 Ozus' World Movie Reviews。 到2007年5月21號尋到。
  25. "Money takes over the movies", 1999年6月5號.
  26. 95: NOTTING HILL。 British Film Institute。 到2007年5月19號尋到。
  27. "Notting Hill premieres in Leicester Square", 1999年4月27號.
  28. NOTTING HILL。 Box Office Mojo。 到2007年5月20號尋到。
  29. "Notting Hill has The Force", 1999年6月2號.
  30. Brandon Gray (1999年6月2號)。 Weekend Box Office。 Box Office Mojo。 到2007年5月20號尋到。
  31. Brandon Gray (7 June 1999)。 Weekend Box Office。 Box Office Mojo。 到2007年5月20號尋到。
  32. Brandon Gray (21 June 1999)。 Weekend Box Office。 Box Office Mojo。 到2007年5月20號尋到。
  33. Brandon Gray (3 August 1999)。 Weekend Box Office。 Box Office Mojo。 到2007年5月20號尋到。
  34. 1999 DOMESTIC GROSSES。 Box Office Mojo。 到2007年5月20號尋到。
  35. WORLDWIDE GROSSES。 Box Office Mojo。 到2007年5月20號尋到。
  36. "Notting Hill breaks film record", 1999年8月26號.
  37. 2000 British Academy of Film and Television Awards。 infoplease.com。 到2007年5月22號尋到。
  38. "Bafta nominations in full", 2000年3月1號.
  39. The Past Winners 1999。 British Comedy Awards。 到2007年5月22號尋到。
  40. "Brits 2000: The winners", 2000年3月3號.
  41. What are they doing?。 British Theatre Guide (20 February 2000)。 到2007年5月21號尋到。
  42. Notting Hill。 TheGoldenGlobes.com。 到2007年5月22號尋到。